ប្រិយមិត្តមួយចំនួនច្បាស់ជាបានស្គាល់លោកគ្រូចិនសែ ម៉ុង ហើយ ដែលលោកគឺជាគ្រូហុងស៊ុយបែបវិទ្យាសាស្ត្រមួយរូប តែងចែករំលែកពីក្បួនហុងស៊ុយ វិធីសាស្រ្ដសែនព្រេងបែបចិន និង គ្រឿងហុងស៊ុយផ្សេងៗ តាមរយៈផេក ហុងស៊ុយ ជាប្រយោជន៍សម្រាប់អ្នកចង់ស្វែងយល់ពីហុងស៊ុយក្នុងការរស់នៅប្រចាំថ្ងៃ ប្រចាំខែ និង ប្រចាំឆ្នាំជាដើម។
ថ្មីៗនេះ លោកគ្រូចិនសែ ម៉ុង ដែលកំពុងមានប្រជាប្រិយភាព តាមរយៈការចែករំលែកចំណេះដឹងហុងស៊ុយ និងរឿងរ៉ាវអមនុស្សដ៏ល្បី បានចែករំលែកនូវរឿងរ៉ាវឆ្នាំទាំង ១២ ដែលកើតឡើង និង របៀបកែកុន ក្នុងខែវិច្ឆិកានេះ ដែលជាខែទី ១១ នៃឆ្នាំទាំង ១២ ដែលមានដូចតទៅ ៖
១. ឆ្នាំជូត
ក្នុងខែនេះ រាសីរបស់អ្នកល្អប្រសើរខ្លាំងគួរសម ការងារមួយចំនួនដែលជិតបានជោគជ័យ ជិតបានលុយ គឺអាចបានលទ្ធផលក្នុងពេលឆាប់ៗនេះ តែក្នុងខែនេះ អ្នកអាចកើតអារម្មណ៍អំនួតខុសប្រក្រតី ដែលនាំឱ្យមានប៉ះពាល់ដល់អារម្មណ៌អ្នកដទៃ ហើយគឺគេស្អប់គេគុំគួន។
ដំណោះស្រាយ ៖ គួរឧស្សាហ៍ធ្វើបុណ្យឱ្យបានច្រើន តាមដែលអាចធ្វើទៅបាន។
២. ឆ្នាំឆ្លូវ
រាសីរបស់អ្នកក្នុងខែនេះហេងបានច្រើន តែក៏មានអ្នកដែលមករារាំងដំណើរប្រមូលហេងរបស់អ្នកផងដែរ ដូចនេះក្នុងខែនេះអ្នកអាចជួបមនុស្សដែលនាំរឿងឱ្យអ្នកជួយគិត ជួយដោះស្រាយ ឥតឈប់ឈរ បើអ្នកចិត្តល្អប្រមាណខ្លួន អ្នកអាចរវល់ពេញទំហឹងជាមួយរឿងអ្នកដទៃ ដោះស្រួលរួចខ្លួន ដោះមិនស្រួលនាំទោសដាក់ខ្លួន ជាពិសេសខាតពេលវេលាទៅធ្វើការងារខ្លួនឯងទៀតផង។
ដំណោះស្រាយ ៖ សូមអ្នកធ្វើបុណ្យចែកប្រាក់ឱ្យបាន ១៨០០០ រៀល យ៉ាងតិច លុយនេះអ្នកអាចចែកជាចំណែក ចែកជូនមនុស្សច្រើននាក់ក៏បានដែរ។
៣. ឆ្នាំខាល
ក្នុងខែនេះ រាសីល្អ ការងារច្រើន តែប្រយ័ត្នសុខភាពបន្តិច រវល់ពេកប្រយ័ត្នបាត់ពេលវេលាឱ្យគ្រួសារខ្លួនឯង ដែលនេះអាចនាំរឿងឱ្យអ្នកផងដែរ។
ដំណោះស្រាយ ៖ គួរឧស្សាហ៍ធ្វើបុណ្យឱ្យបានច្រើន តាមដែលអាចធ្វើទៅបាន កាត់បន្ថយការផឹកគ្រឿងស្រវឹង និង បន្ថយការហូបសាច់ឆៅ។
៤. ឆ្នាំថោះ
រាសីខែនេះ គឺមានភាពល្អប្រសើរខ្លាំង ខែនេះអ្នកអាចទទួលបានជំនួយពីអ្នកដទៃបាន តែអ្នកត្រូវប្រយ័ត្នជាមួយមនុស្សដែលមកជិតដិតជាមួយអ្នកខុសប្រក្រតី ហើយប្រយ័ត្នបន្តិចលើសុវត្ថិភាពរាងកាយ ប្រយ័ត្នចាញ់បោកអ្នកដទៃ ដែលនាំឱ្យអ្នកខាតបង់ខ្លួនប្រាណ។
ដំណោះស្រាយ ៖ សូមហូបទឹកឱ្យបានច្រើន ដើម្បីបំពេញធាតុទឹកបន្ថែមបន្តិច ហើយបើអាចព្យាយាមត្រាំទឹក ងូតទឹកស្អាតឱ្យបានច្រើន។
៥. ឆ្នាំរោង
ក្នុងខែវិច្ឆិកានេះ អ្នកឆ្នាំរោង សូមប្រយ័ត្នបន្តិចពាក់ព័ន្ធករណីឆក់អគ្គីសនីនាំឱ្យមានគ្រោះថ្នាក់ដល់ខ្លួន។ អ្នកដែលធ្វើការជាមួយទឹក ក៏ត្រូវប្រយ័ត្នដូចគ្នា អ្នកត្រូវប្រយ័ត្នបន្ថែមទៀត សម្រាប់អ្នកដែលមានជំងឺដុំសាច់ ដុំមហារីក សូមរក្សាសុខភាពឱ្យបានល្អ សូមយកចិត្តទុកដាក់តាមដានជាមួយគ្រូពេទ្យជាប់ជាប្រចាំ។
ដំណោះស្រាយ ៖ សូមអ្នកធ្វើបុណ្យចែកប្រាក់ចំនួន ៣៨០០០ រៀល យ៉ាងតិច លុយនេះអ្នកអាចចែកជាចំណែក ចែកជូនមនុស្សច្រើននាក់ក៏បានដែរ។ ថែមទាំងគួរពាក់គ្រឿងអលង្ការប្លាទីនស ជាប់ខ្លួនឱ្យបាន ១ យ៉ាងតិច។
៦. ឆ្នាំម្សាញ់
រាសីក្នុងខែនេះ មានហានិភ័យខ្ពស់សម្រាប់អ្នកកំពុងព្យាបាលជំងឺ ឬអ្នកដែលប្រាកបអាជីព ពាក់ព័ន្ធជាមួយគ្រឿងភ្លើង ( ហ្គាស សាំង ជាដើម ) បើទោះមិនមានគ្រោះថ្នាក់នៅកន្លែងការងារ(គ្រឿងភ្លើង) ក៏ដោយ អ្នកក៏អាចគ្រោះថ្នាក់ផ្សេងៗទៀតបាន ព្រោះរាសីគាត់បានដាក់ទៅហើយ។
ដំណោះស្រាយ ៖ យកខោអាវពាក់ផ្ទាល់ខ្លួនចែកដល់អ្នកក្រីក្រ ១ កំប្លេ , លែងត្រីទឹកសាប ៨ ក្បាល ចូលទន្លេ ឬ ប្រភពដែលមានចរន្ដទឹកហូរ បើអាច ទៅបូមឈាម ឬ ជួសឈាមបន្តិចក៏រឹតតែល្អ។
៧. ឆ្នាំមមី
រាសីអ្នកក្នុងខែនេះ អ្នកអាចឆាប់ប្រែប្រួលអារម្មណ៍ខ្លាំង ការប្រែប្រួលនេះអាចធ្វើឱ្យអ្នកបាត់បង់មនុស្សជុំវិញខ្លួន ថែមទាំងនាំរឿងឱ្យអ្នកច្រើនទៀតផង សូមរក្សាទឹកចិត្តឱ្យបានល្អតាមដែលអាចធ្វើទៅបាន។ ក្នុងខែនេះ អ្នកគួរប្រុងប្រយ័ត្នករណីចោរកម្ម ជាពិសេសអ្នកជិះម៉ូតូ អាចបាត់ម៉ូតូជាដើម តែយ៉ាងហោចគួរតែប្រុងប្រយ័ត្នជារួមតែម្ដងក៏បានដែរ។
ដំណោះស្រាយ ៖ សូមព្យាយាមរក្សាផ្លូវចិត្តឱ្យបានល្អខ្លាំង សូមហូបបន្លែបៃតងឱ្យបានច្រើន និង សូមព្យាយាមហូបម្ហូបបួសឱ្យបានច្រើន តាមដែលអាចធ្វើទៅបាន។
៨. ឆ្នាំមមែ
រាសីអ្នក ហេង ៥០% និង មានរឿង ៥០%។ រឿងល្អគឺការងារថ្មីៗមកបានច្រើនជាងមុន ដូចនេះអ្នកអាចគិតច្រើន ជាពិសេសអាចមានបញ្ហាច្រើនជាងមុន តែសុទ្ធតែដោះស្រាយបានដូចគ្នា។ តែរឿងដែលត្រូវប្រយ័ត្ន គឺមានបញ្ហាដែលពាក់ព័ន្ធជាមួយដែកស្រួចៗ ដូចនេះសូមគេចចេញពីកន្លែងដែលមានគ្រោះថ្នាក់ដែកនោះតែម្ដង។
ដំណោះស្រាយ ៖ សូមអ្នកឧស្សហ៍អុចធូប កន្លែងកុងម៉ា ឱ្យបានញឺកញាប់ ហើយអ្នកគួរប្រើប្រាស់ពណ៌ដែលអ្នកត្រូវការឱ្យបានជាប់លាប់។
៩. ឆ្នាំវក
រាសីខែនេះ អ្នកបាត់បង់មនុស្សដែលស្រលាញ់ក្នុងខែនេះ ជាពិសេសអ្នកដែលឆ្នាំវក ពុំគួរទៅស្ទាបពោះអ្នកដែលពពោះនោះទេ ហើយអ្នកឆ្នាំវក ដែលមានកូនៗកំពុងឈឺ ឬ រាល់ថ្ងៃពួកគាត់ជិះម៉ូតូ កង់ ឡានទៅសាលារៀនជាដើម សូមប្រុងប្រយ័ត្នឱ្យបានខ្ពស់។
ដំណោះស្រាយ ៖ សូមព្យាយាមងូតទឹកលាងស៊យ ( ទឹក ១ ធុង + ផ្កាម្លិះ + ផ្កាឈូក ៩ ដើម + អង្ករ ១ ក្ដាប់ លាយចូលគ្នា ) ងូតឱ្យបានញឹកញាប់ យ៉ាងហោច ១ អាទិត្យ ២ ដង គ្រប់យ៉ាងអាចដោះស្រាយបានជាង ៨០%។
១០. ឆ្នាំរកា
រាសីអ្នកឆ្នាំរកា រាសីរបស់អ្នកល្អច្រើន ផ្លូវចិត្តធូរស្រាលជាងមុន តែអ្នកគួរប្រយ័ត្នរឿងមួយ អ្នកអាចមានអាការៈពុលអាហារ និង ជាប់សរសៃ ដោយមិនដឹងមូលហេតុ ដូចនេះគួរប្រយ័ត្ន និង រៀបចំខ្លួនឱ្យបានល្អ តាមដែលអាចធ្វើទៅបាន។
ដំណោះស្រាយ ៖ សូមព្យាយាមធ្វើបុណ្យឱ្យបានច្រើន តាមដែលអាចធ្វើទៅបាន។
១១. ឆ្នាំច
រាសីក្នុងខែនេះ រាសីរបស់អ្នក គឺមានភាពល្អខ្លាំង អ្នកឆ្នាំច ក្នុងខែនេះមានដំណឹងល្អច្រើនដែលចូលក្នុងជីវិតអ្នក។ ដូចនេះអ្នកត្រូវចេះចាប់យកឱកាសទាំងនោះតាមដែលអាចធ្វើទៅបាន និង គិតថាទទួលបានផលចំណេញត្រឡប់មកអ្នកវិញ តាមដែលអ្នកធ្វើទៅបាន។
ដំណោះស្រាយ ៖ ព្យាយាមគេងឱ្យបានគ្រប់គ្រាន់ និង ងូតទឹកឱ្យបានច្រើន អនាម័យឱ្យបានច្រើនផងដែរ។
១២. ឆ្នាំកុរ
ជាទូទៅ រាសីមិនសូវល្អនោះទេ ដូចនេះអ្នកគួរតែព្យាយាមរក្សាខ្លួនឱ្យនៅតំបន់សុវត្ថិភាពឱ្យបានច្រើន ជាងការបោះទុនលោតផ្លោះធំៗពេកអី។ មិនចំណេញដល់អ្នកនោះទេ ជាពិសេសប្រយ័ត្នបន្តិចពាក់ព័ន្ធជាមួយគ្រោះរលាកភ្លើង ជាពិសេសរលាកគ្រឿងក្នុង ដូចជារលាកពោះវៀន ក្រពះ ថ្លើម សួត កម្រិតធ្ងន់ធ្ងរ។ សូមថែរក្សា និង តាមដានសុខភាពជាមួយគ្រូពេទ្យ។
ដំណោះស្រាយ ៖ យកខោអាវពាក់ផ្ទាល់ខ្លួនចែកដល់អ្នកក្រីក្រ ១ កំប្លេ , លែងត្រីទឹកសាប ៨ ក្បាល ចូលទន្លេ ឬ ប្រភពដែលមានចរន្ដទឹកហូរ , បើអាច ទៅបូមឈាម ឬ ជួសឈាមបន្តិចក៏រឹតតែល្អ៕
ដកស្រង់ពី ៖ ហុងស៊ុយ
