មហាជនជាច្រើនបានជ្រាបហើយពី តាចេក ដែលធ្លាប់ជាតារាកំប្លែងជើងចាស់ដ៏មានប្រជាប្រិយភាពមួយរូប ប៉ុន្តែមួយរយៈធំចុងក្រោយនេះ លោកហាក់បាត់មុខពីការសម្ដែងកំប្លែងលើកញ្ចក់ទូរទស្សន៍ផ្សេងៗ ដោយគេបានឃើញថាលោកតាកំពុងរស់នៅក្នុងជីវិតដែលមានជីវភាពលំបាកខ្លាំង។
ពិតណាស់ ប៉ុន្មានឆ្នាំកន្លងមកនេះ គេតែងឃើញ តាចេក បង្ហោះរូបភាព និង សារលើហ្វេសប៊ុកបង្ហាញពីការតស៊ូរបស់លោកតា ដែលប្រកបរបរលក់ភេសជ្ជៈ និង លក់ផ្លែឈើបន្លែតាមដងផ្លូវ ធ្វើឱ្យមហាជនអ្នកគាំទ្រសម្ដែងនូវភាពអាណិតអាសូរដល់លោកជាពន់ពេក។ ដោយឡែក ក្រោយឃើញពីជីវភាពដ៏លំបាករបស់លោកតាហើយ កន្លងមកក៏មានសប្បុរសជនមួយចំនួនបានជួយថវិកាទៅដល់លោកតាផងដែរ។
នៅដើមឆ្នាំ ២០២៥ នេះ លោកតា ចេក បានបង្ហោះសកម្មភាពទទួលបានការងារច្រៀងកាត់សក់ក្នុងរោងការនាស្រុកភូមិរបស់លោកតាម្តងម្កាលដែរ ប៉ុន្តែនៅតែមិនទាន់អាចធ្វើឱ្យជីវភាពលោកតាធូរស្រាលឡើងនៅឡើយ ពោលគឺលោកតា ចេក នៅតែដើរបេះបន្លែយកទៅលក់ដើម្បីផ្គត់ផ្គង់ជីវភាពប្រចាំថ្ងៃដូចដើម៕
