នាពេលថ្មីៗនេះ មហាជនអ្នកប្រើប្រាស់បណ្ដាញសង្គម បាន និង កំពុងនាំគ្នាផ្ទុះការចាប់អារម្មណ៍នូវការបកស្រាយអំពីតួអក្សរខ្មែរ ឬ ហៅថាអក្សរទេព តាមរយៈលោក មុំខ្លឹម ខ្លឹមចន្ទន៍ នៅក្នុងវីដេអូនៃកម្មវិធី «សង្គមពិត» ដែលក្នុងនោះលោកបានលើកយកនូវលក្ខណៈពិសេសនៃតួអក្សរខ្មែរ ប្រកបដោយអំណះអំណាងសមហេតុសមផល ទទួលបានការពេញនិយមចូលចិត្តយ៉ាងច្រើន។
ថ្ងៃនេះផងដែរ យើងសូមលើកយកនូវជីវប្រវត្តិសង្ខេបរបស់លោក មុំខ្លឹម ខ្លឹមចន្ទន៍ មកបង្ហាញជូនប្រិយមិត្ត បន្ទាប់ពីលោកបានចំណាយពេលវេលាផ្ដល់បទសម្ភាសមកកាន់សារព័ត៌មាន «ប្រជាប្រិយ» ដូចតទៅ ៖
+ ជីវិតរស់នៅ និង គ្រួសារ
លោក មុំខ្លឹម ខ្លឹមចន្ទន៍ កើតនៅថ្ងៃទី ០៧ ខែសីហា ឆ្នាំ ១៩៧០ លោកមានអាយុ ៥៤ ឆ្នាំ មានទីកន្លែងកំណើតកើតជានៅឯក្រុងព្រះសីហនុ និង បច្ចុប្បន្នលោកកំពុងរស់នៅរាជធានីភ្នំពេញ ក្នុងសង្កាត់វាលវង់ ខណ្ឌ ៧ មករា រាជធានីភ្នំពេញ។ លោកមានភរិយាឈ្មោះ ហុង ខេមារី មានអាយុ ៥៣ ឆ្នាំ និង មានកូនស្រី ៤ នាក់ បច្ចុប្បន្នមានទីលំនៅក្នុងសង្កាត់វាលវង់ ខណ្ឌ ៧ មករា រាជធានីភ្នំពេញ។
+ ប្រវត្តិសិក្សា
បើនិយាយពីការសិក្សា លោក មុំខ្លឹម ខ្លឹមចន្ទន៍ បានឆ្លងកាត់ការសិក្សានៅតាមព្រំដែន ក្នុងឆ្នាំ ១៩៧៩ ដល់ ១៩៩០ ត្រង់ជំរំជនភៀសខ្លួនភ្នំដងរែក ដោយបានបញ្ចប់ការសិក្សាថ្នាក់បឋមភូមិ និង ទុតិយភូមិ។ លុះដល់ឆ្នាំ ២០០១ លោកបានបួសមួយរយៈពេលក្នុងវត្តខ្មែរ ត្រៃរតនារាម នៅសហរដ្ឋអាមេរិក ស្ថិតក្នុងក្រុងឡូវែល រដ្ឋម៉ាសាជូសេត មានគ្រូឧបជ្ឈាយ៍ ជាសម្ដេចព្រះមហាឃោសនន្ទ វ៉ា យ៉ាវ។ បន្ទាប់ពីសឹកបានមួយរយៈ នៅក្នុងឆ្នាំ ២០០៤ លោកបានបួសជាថ្មីនៅក្នុងវត្តខ្មែរពុទ្ធឃយា លើទឹកដីឥណ្ឌា។
នៅឆ្នាំ ២០០៦ លោកបានបញ្ចប់ការសិក្សាថ្នាក់អនុបណ្ឌិតនីតិសាស្ត្រ និង វិទ្យាសាស្ត្រនយោបាយ នៅសាកលវិទ្យាល័យបៀលប្រាយ។ ឆ្លងកាត់ការសិក្សាកន្លងមក លោក មុំខ្លឹម ខ្លឹមចន្ទន៍ ចេះភាសាថៃ និង អង់គ្លេស ព្រមទាំងចេះភាសាឡាវ អាចស្ដាប់បាន ៦០%។
លោកក៏បានសិក្សារៀនសូត្រផ្នែកអាចារ្យ នៅជំនាន់ទី ៤៥ នៅក្រសួងធម្មការ និង សាសនា និង បានសិក្សាអក្សរសិល្បិ៍ពីលោកគ្រូសាស្ត្រាចារ្យសាលាបាលីជាន់ខ្ពស់ ហម សារឿន ព្រមទាំងបានសិក្សាធម៌អារ្យពីលោកគ្រូ ព្រំ កេសា។
+ការងារបច្ចុប្បន្ន
បច្ចុប្បន្ន លោក មុំខ្លឹម ខ្លឹមចន្ទន៍ គឺជាគណៈកម្មការចារ្យនៅមជ្ឈមណ្ឌលវិបស្សានាធុរ ភូមិភាគឦសាន នៃកម្ពុជា ទីប្រតិស្ឋានមហាបរមពិធិព្រឹក្ស ៥០០០ ដើម ស្ថិតនៅឃុំគូលែនត្បូង ស្រុកគូលែន ខេត្តព្រះវិហារ៕
