ឆ្នាំនេះ មនុស្សស្រីកើតឆ្នាំជូត ជោគរាសីល្អគេនាំលាភដល់ៗផ្ទះ តែមនុស្សប្រុសត្រូវប្រយ័ត្នមិត្តភក្តិ នាំខាតបង់ប្រាក់

ទេវតាឆ្នាំថ្មី បុត្រីទី ៤ នៃកបិលមហាព្រហ្ម ព្រះនាងមណ្ឌាទេវី នឹងយាងចុះមកគ្រប់គ្រង ជម្ពូរទ្វីបមនុស្សលោកឆ្នាំថ្មី នៅថ្ងៃពុធ​ ៣ កើត​ ខែពិសាខ ត្រូវនឹងថ្ងៃទី ១៤ ខែ មេសា គ្រិស្តសករាជ ២០២១ វេលាម៉ោង ០៤ និង ០០ នាទីទៀបភ្លឺ ។

តាមសៀវភៅ​មហាសង្ក្រាន្ត ដែល​រៀបរៀង​ដោយ​ឯកឧត្ដម អ៊ឹម បុរិន្ទ​ អគ្គលេខាធិការ​រង គណៈកម្មការ​ជាតិ​រៀបចំ​បុណ្យ​ជាតិ និង ​អន្តរជាតិ គណៈកម្មការ​ស្រាវជ្រាវ​វិជ្ជា​ហោរាសាស្ត្រ និង ​ប្រពៃណី​ទំនៀម​ទម្លាប់​ខ្មែរ បាន​បង្ហាញ​អំពី​ ជោគជតារាសីប្រចាំ ឆ្នាំឆ្លូវ សម្រាប់លោកអ្នកកើតឆ្នាំជូត ដូចខាងក្រោម ៖

បើជាមនុស្សប្រុស ឆ្នាំជូត ទំនាយថា ៖

ក្នុងឆ្នាំនេះ ជាឆ្នាំដែលអ្នកមិនសូវរីករាយសោះឡើយ ទោះជាយ៉ាងនេះក៏ដោយ អ្នកគង់ បានសម្រេច ក្នុងការដែលអ្នកបានតាំងចិត្តទុកយ៉ាងប្តូរផ្តាច់ មិត្តភក្តិរបស់អ្នក ឬ មនុស្សធ្វើការជា មួយអ្នក គេជាមនុស្សអាប់ជោគថោករាសី ដឹកនាំអ្នកឲ្យខកខាតទុនក្នុងរយៈឆ្នាំនេះ អ្នកមិនគួរ ធ្វើដំណើរផ្លូវឆ្ងាយពេកទេ សូម្បីតែបើកហាងលក់ដូរឥវ៉ាន់ថ្មី ឬ ប្រកបការយ៉ាងណាក៏ដោយ អ្នកកុំធ្វេសប្រហែសឲ្យសោះ ហើយមិនគួរពឹងរកឲ្យ គេជួយទុក្ខធុរៈខ្លួនជាដាច់ខាត ។

បើជាមនុស្សស្រី ឆ្នាំជូត ទំនាយថា ៖

ឆ្នាំនេះ ជាឆ្នាំដែលលោកអ្នកមានសេចក្តីសុខសម្រាន្តយ៉ាងលើសលុប ហើយបានគាប់ ចិត្តគ្រប់យ៉ាង មានគេនាំកំណល់រង្វាន់មកឲ្យដល់ទីកន្លែង ក្នុងឆ្នាំនេះជោគរាសី របស់អ្នកល្អ ជាទីបំផុតបើអ្នកមានបំណងធ្វើអី មុខជាបានសម្រេចផលយ៉ាងមែនពិត ។ ប៉ុន្តែថាអ្នកកុំផ្តេកផ្ដួល នឹងការជួយឈឺឆ្អាល ពីគេឯទៀតខ្លាំងពេក នៅក្នុងរឿងរាប់អានស្រឡាញ់ទុកចិត្ត គួរតែ ប្រយ័ត្នឲ្យមែនទែន ហើយ ខំស្ទាបស្ទង់បន្តិចផង បើសិនជាវៀរមិនផុត ។ នៅក្នុងបន្ទុកក្រុមគ្រួសារ លោកអ្នកដែលកើតឆ្នាំនេះ គឺមានសេចក្តីសុខយ៉ាងក្រៃលែង ៕