អ្នកគ្រូហុងស៊ុយ ណាលី បង្ហើបថាកុំមើលងាយស្ថានការណ៍ ៤ ឆ្នាំពេញនេះ អ្វីក៏អាចកើតឡើងដែរ សុទ្ធតែរឿងស្មានមិនដល់

តាមរយៈក្បួនហុងស៊ុយ ជាទូទៅការផ្លាស់ប្ដូរយុគសម័យតែងមានរយៈពេល ២០ ឆ្នាំម្ដង ដែលនាំឱ្យមានការផ្លាស់ប្ដូរឥរិយាបថនៃការរស់នៅ។ យ៉ាងណាមិញ ឈានចូលក្នុងឆ្នាំ ២០២៤ នេះ គឺជាយុគថ្មីទើបតែផ្លាស់ប្ដូរ និង ឈានចូលមកដល់ ដែលយុគនេះត្រូវបានគេស្គាល់ថាជាយុគ ៩ ជាយុគភ្លើង។

ស្របគ្នានេះផងដែរ បើតាមអ្នកគ្រូ ណាលី ជាគ្រូហុងស៊ុយបែបវិទ្យាសាស្ត្រដ៏ល្បីមួយរូប ព្រមទាំងជាម្ចាស់ក្រុមហ៊ុន ម៉ាស្ទ័រ ណាលីហុងស៊ុយ មានឈ្មោះល្បីល្បាញបានចែករំលែកនូវរឿងដែលត្រូវដឹងមួយនៅក្នុងយុគ ៩ នេះ ពោលគឺក្នុងឆ្នាំ ២០២៤ ដល់ឆ្នាំ ២០២៨ សម្រាប់ជាចំណេះដឹង និង បម្រើឱ្យការរស់នៅប្រចាំថ្ងៃ។

ជាក់ស្ដែង កាលពីពេលកន្លងទៅ អ្នកគ្រូ ណាលី បានបង្ហោះលើផេកផ្លូវការឱ្យបានដឹងថា ៖ «កុំមើលងាយស្ថានការណ៍ឆ្នាំ ២០២៤ ដល់ឆ្នាំ ២០២៨ អ្វីក៏អាចកើតឡើងដែរ គ្រប់យ៉ាងសុទ្ធតែរឿងស្មានមិនដល់»។

អ្នកគ្រូហុងស៊ុយ ក៏ធ្លាប់បានបញ្ជាក់ដាស់តឿនឱ្យដឹងផងដែរថា ៖ «យុគ ៩ គ្មានអ្វីទៀងទាត់ទេ ឡើងក៏លឿនធ្លាក់ក៏លឿន កុំភ្លេចខ្លួនរក្សាលំនឹងឱ្យបាន» ហើយ «យុគ ៩ មនុស្សមានចិត្តឆេវឆាវ ឆាប់ខឹងខុសពីធម្មតា អ្វីដែលអាចរំងាប់ចិត្តបានគួរឧហ្សាហ៍ទៅសមាធិ»៕