ផ្ទុះកក្រើក! ពេជ្រ វត្តីសារ៉ាវឌ្ឍី បំបែកកំណត់ត្រាបោះជំហានចូល Top ១០ MGI យ៉ាងអស្ចារ្យដោយសមត្ថភាព

ពិតណាស់មុននេះ មហាជនអ្នកគាំទ្របវរកញ្ញាខ្មែរមានការរំភើបចិត្តខ្លាំងម្ដងរួចហើយ ក្រោយពីកម្មវិធីបានធ្វើការប្រកាសថា Miss Grand Cambodia ២០២២ ពេជ្រ វត្តីសារ៉ាវឌ្ឍី ទទួលបានលទ្ធផលឈានចូលដល់ Top ២០ ហើយនៅរាត្រីក្នុងវគ្គផ្ដាច់ព្រ័ត្រនៃការប្រកួតសម្រស់ដ៏អស្ចារ្យ Miss Grand International នេះ។

ដោយឡែក អ្វីដែលធ្វើឱ្យមហាជនកាន់តែភ្ញាក់ផ្អើលកក្រើកបណ្ដាញសង្គម និង សែនរំភើបចិត្តទៅទៀត ដោយពេលនេះកម្មវិធីបានធ្វើការប្រកាសថា Miss Grand ពេជ្រ វត្តីសារ៉ាវឌ្ឍី បានឈានដល់ Top កំពូលហើយ គឺ Top ១០ ដែលជាកំណត់ត្រាថ្មីសម្រាប់កម្ពុជា។ ដោយបវរកញ្ញាកម្ពុជារូបនេះ អាចឈានចូលដល់វគ្គ ១០ នាក់ចុងក្រោយលើឆាកប្រកួតអន្តរជាតិលំដាប់ពិភពលោកដ៏អស្ចារ្យមួយនេះ គឺទទួលបានដោយសមត្ថភាពរបស់ខ្លួន គឺមិនមែនដោយសារទទួលពានតាមរយៈការបោះឆ្នោតពីមហាជនឡើយ។

ខណៈនេះដែរ មហាជនខ្មែរទាំងអស់ កំពុងតែសម្ដែងនូវមោទនភាពខ្លាំងចំពោះ ពេជ្រ វត្តីសារ៉ាវឌ្ឍី ដែលទទួលបានលទ្ធផលល្អលើកមុខមាត់ប្រទេសឱ្យពិភពលោកបានស្គាល់កាន់តែខ្លាំង ហើយពេលនេះដែរ មហាជនក៏កំពុងតែបន្តតាមដានការប្រកួតនេះ និង បន្តលើកទឹកចិត្តដល់បវរកញ្ញាយើងជាហូរហែផងដែរ៕