សល់តែការចង់ចាំ! តារាប្រុសស្រី ៩ រូបក្នុងវិស័យចម្រៀង និង MC បានលាចាកលោកទាំងវ័យក្មេង ក្នុងហេតុការណ៍រ/ន្ធ-ត់ៗទាំងនេះ

មិនថារយៈពេលកន្លងទៅយូរប៉ុនណា ដំណឹងនៃការបាត់បង់ជីវិតគឺជាដំណឹងដ៏ក្រៀមក្រំ និង សោកស្តាយបំផុតនៃការចងចាំ ជាពិសេសគឺធនធានសិល្បករ សិល្បការិនីល្បីៗ ដែលបានលាចាកលោកទៅទាំងវ័យក្មេង។ ទោះបីជារូបកាយបានឃ្លាតចាកចេញពីពិភពលោកនេះទៅក៏ពិតមែន តែស្នាដៃ និង ការចងចាំរបស់ពួកគេ ហាក់នៅដិតជាប់ក្នុងអារម្មណ៍អ្នកគាំទ្រ ឱ្យនឹករឭក និង ស្តាយស្រណោះមិនអស់អាល័យឡើយ។ ខាងក្រោមនេះគឺជាតារាប្រុសស្រីល្បីឈ្មោះ ដែលទទួលមរណភាពទាំងវ័យក្មេងក្នុងហេតុការណ៍រន្ធត់ៗផ្សេងៗគ្នា មានដូចជា ៖

១. តារាចម្រៀង វណ្ណ មករា

លោក វណ្ណ មករា បានទទួលមរណភាព កាលពីថ្ងៃទី ១០ ខែមករា ឆ្នាំ ២០១៦ កន្លងទៅ ដោយសារគ្រោះថ្នាក់ចរាចណ៍ក្រឡាប់រថយន្ត នៅតាមបណ្ដោយផ្លូវជាតិលេខ ៤។

២. តារាចម្រៀង និង សម្ដែង រាជ បុរី

តារាសម្ដែងរូបនេះ បានទទួលមរណភាពនៅក្នុងគ្រោះថ្នាក់ចរាចណ៍ បន្ទាប់ពីរូបលោកត្រឡប់មកពីការដើរកម្សាន្តនៅប្រទេសថៃ ជាមួយមិត្តភក្ដិ កាលពីថ្ងៃទី ១៦ ខែមេសា ឆ្នាំ ២០១៦។

៣. តារាចម្រៀង សាន ស្រីឡៃ

អតីតបេក្ខភាព The Voice Cambodia រដូវកាលទី ២ រូបនេះ បានទទួលមរណភាពកាលពីថ្ងៃទី ១៦ ខែតុលា ឆ្នាំ ២០១៧ ដោយសារការបាញ់សម្លាប់របស់ស្វាមីនាងផ្ទាល់តែម្ដង បន្ទាប់មកស្វាមីរបស់តារាចម្រៀងរូបនេះ ក៏បានបាញ់សម្លាប់ខ្លួនឯងតាមក្រោយ ដោយបន្សល់ទុកនូវកូនប្រុសកំព្រា ២ នាក់។

៤. តារាចម្រៀង តាក់ ចន្នី

ជាតារាចម្រៀងរ៉ុកឃែនរ៉ូលខ្មែរ និង បានសាងប្រជាប្រិយភាពលេចធ្លោ នៅលើឆាកអន្តរជាតិផងដែរ ។ ជាអកុសលកំពុងតែមានឈ្មោះល្បី ស្រាប់តែតារាស្រីរូបនេះ បានជួបគ្រោះថ្នាក់ចរាចណ៍បណ្ដាលឱ្យនាងបាត់បង់ជីវិតតែម្ដង នៅយប់ថ្ងៃទី ២០ ខែ មីនា ឆ្នាំ ២០១៨ នៅក្នុងខណ្ឌចំការមន រាជធានីភ្នំពេញ។

៥. តារាចម្រៀង ខេមរៈ ស្រីពៅ

ជាតារាចម្រៀងល្បីល្បាញ ហើយក៏ត្រូវជាប្អូនស្រីសំណព្វចិត្តរបស់តារាចម្រៀងជួរមុខលោក ខេមរៈ សិរីមន្ដ ក្រោយពីមានជំងឺក្រលៀន និង សួតរួចមក ម្ចាស់បទ «ក្រមុំស្រុកស្រែ» រូបនេះ បានចាកចេញទៅព្យាបាលជំងឺនៅមន្ទីរពេទ្យមួយកន្លែងក្នុងប្រទេសឥណ្ឌា តែដោយសារស្ថានភាពជំងឺធ្ងន់ធ្ងរពេក នាងក៏បានទទួលមរណភាពទាំងវ័យក្មេង នៅថ្ងៃទី ២៥ ខែមករា ឆ្នាំ ២០១៩។

៦. តារាចម្រៀង ហ៊ាង វេងហេង

តារាចម្រៀងវ័យក្មេងរូបនេះ បានធ្វើឱ្យទស្សនិកជនមានការភ្ញាក់ផ្អើលនូវដំណឹងរមណភាពរបស់លោក កាលពីយប់ថ្ងៃទី ១២ កក្កដា ឆ្នាំ ២០២០ កន្លងទៅ ដោយសារគ្រោះថ្នាក់ចរាចរណ៍ នៅចំណុចស្តុបទួលទំពូង ក្បែរហាងទន្លេបាសាក់ ផ្លូវម៉ៅសេទុង ក្នុង ខណ្ឌចំការមន រាជធានីភ្នំពេញ។

៧. តារាចម្រៀង នាង ប្រាក់សុគន្ធ

អតីតបេក្ខភាព Cambodian Idol រដូវកាលទី ២ រូបនេះ បានទទួលទទួលមរណភាពនៅយប់ថ្ងៃទី ២៥ ខែធ្នូ ឆ្នាំ ២០២១ វេលាម៉ោង ៣ ទៀបភ្លឺ ដោយសារឡានបុកពីក្រោយ ពេលចេញពីច្រៀងនៅរាជធានីភ្នំពេញ។

៨. តារាចម្រៀង ពេជ្រ រដ្ឋា

តារាចម្រៀងប្រចាំផលិតកម្មថោន លោក ពេជ្រ រដ្ឋា បានទទួលមរណភាពកាលពីយប់អធ្រាត្រក្រោយបញ្ចប់ថ្ងៃចុងក្រោយពិធីបុណ្យអុំទូក ឈានចូលថ្ងៃទី ២៩ ខែវិច្ឆិកា ឆ្នាំ ២០២៣ កន្លងទៅ ដោយគ្រោះថ្នាក់ចរាចរណ៍។

៩. MC Mario

ពិធីករកម្មវិធីប្រគំតន្ត្រី MC Mario បានទទួលមរណភាពកាលពីយប់ទៀបភ្លឺថ្ងៃទី ១៩ ខែមិថុនា ឆ្នាំ ២០២៤ កន្លងទៅ ដោយការធ្វើអត្តឃាតលោតទឹកសម្លាប់ខ្លួននៅលើស្ពានឫស្សីកែវ៕