តស់វេចកន្ទេលទៅ! ថ្ងៃ ១៤ និង ១៥ នៅអ៊ីអន ៣ មានសម្ដែងល្ខោនស្រមោលស្បែកតូចរឿងល្អៗមើល ២ ថ្ងៃពេញ
កាលពីថ្ងៃទី ១១ ខែកញ្ញា ឆ្នាំ ២០២៤ កន្លងទៅ តាមរយៈផេក AEON MALL Mean Chey បានជូនដំណឹងអំពីការសម្ដែងទស្សនីយភាពមហោស្រពល្ខោនស្រមោលស្បែកតូច ដឹកនាំសម្តែងដោយ ព្រឹទ្ធាចារ្យចម្មការភិរក្ស ជៀន សុផាន មត៌កមនុស្សរស់ ដែលនឹងធ្វើឡើងរយៈពេល ២ ថ្ងៃ គឺថ្ងៃទី ១៤-១៥ ស្ថិតនៅជាន់ទី ៣ កន្លែងបោះតង់។
ការសម្ដែង នឹងធ្វើឡើងរយៈពេល ២ ថ្ងៃ ដែលមានកាលបរិច្ឆេទដូចខាងក្រោម ៖
– ថ្ងៃទី ១៤ កញ្ញា (វេលាម៉ោង ២ រសៀល និង ៥:៣០ ល្ងាច) រឿងឪពុកក្មេករើសកូនប្រសា
– ថ្ងៃទី ១៥ កញ្ញា (វេលាម៉ោង ២ រសៀល និង ៥:៣០ល្ងាច) រឿងព្រះថោងនាងនាគ និង រឿងរាមកេរ្តិ៍ (ដកស្រង់ត្រង់ឈុតយក្សចាប់នាងសីតា)
ក្នុងនោះ ក្រៅពីទស្សនីយភាពមហោស្រពល្ខោនស្រមោលស្បែកតូច ដែលដឹកនាំសម្តែងដោយព្រឹទ្ធាចារ្យចម្មការភិរក្ស ជៀន សុផាន មត៌កមនុស្សរស់ ក៏មានសកម្មភាពផ្សេងៗដូចជា ការបង្រៀនដាប់ស្បែក និង យកទៅផ្ទះបានដោយឥតគិតថ្លៃ រួមទាំងការរៀបរាប់ពីប្រវត្តិ នៃល្ខោនស្រមោលស្បែកតូច និង ការសាកសួរអំពីល្ខោនស្រមោលស្បែកតូចផងដែរ៕
