(វីដេអូ) កំពុងខ្នះខ្នែងនឹងការប្រកួត ប្រាសាទ ដាវីន ស្រក់ទឹកភ្នែកដោយក្ដីរំភើប ពេលឃើញសន្ទុះការគាំទ្រពីរៀមច្បងសិល្បករ និង មហាជនចំពោះនាង

ពិតណាស់ មកដល់ពេលនេះ កម្មវិធី Miss Universe 2024 លើកទី ៧៣ កាន់តែកៀកថ្ងៃប្រកួតផ្ដាច់ព្រ័ត្រហើយ ដែលនឹងប្រព្រឹត្តទៅនៅថ្ងៃទី ១៦ ខែវិច្ឆិកា ឆ្នាំ ២០២៤ ខាងមុន ដោយពេលនេះដែរ ក្រឡេកទៅមើលបេក្ខភាពបវរកញ្ញាកម្ពុជាយើង អ្នកនាង ប្រាសាទ ដាវីន ក៏កំពុងស្ថិតក្នុងដំណើរការប្រកួតត្រៀមខ្លួនយ៉ាងស្វាហាប់។

ងាកមកមើលមហាជនអ្នកគាំទ្រវិស័យបវរកញ្ញាកម្ពុជាលើបណ្ដាញសង្គមវិញ ក៏កំពុងបង្ហោះចែករំលែកនូវសកម្មភាពរបស់បវរកញ្ញា ប្រាសាទ ដាវីន ភ្ជាប់ជាមួយនឹងក្ដីមោទកភាពស្ងើចសរសើរ និង ជួយលើកទឹកចិត្តជាបន្តបន្ទាប់ចំពោះនាងក្នុងដំណើរការប្រកួតលើឆាកអន្តរជាតិដ៏អស្ចារ្យនេះ។

ស្របពេលកម្មវិធីកំពុងដំណើរការប្រកួតនេះដែរ មហាជនអ្នកគាំទ្រវិស័យបវរកញ្ញា ជាពិសេសសិល្បករកម្ពុជាជាច្រើនរូបកំពុងខ្នះខ្នែងខ្លាំងទាក់ទងនឹងដំណើរការបោះឆ្នោតឱ្យ ប្រាសាទ ដាវីន ខណៈកម្មវិធី Miss Universe មានការបើកឱ្យបោះឆ្នោតគាំទ្រចំពោះបេក្ខភាពបវរកញ្ញាតំណាងប្រទេសនីមួយៗ ដើម្បីឈ្នះពានរង្វាន់ Top 10 Voice For Change ដែលអាចទទួលបានជ័យលាភីពានមាស និង ប្រាក់ ក្នុងចំណោមប្រទេសទាំង ១០។

ក្នុងនោះ តាមរយៈការចែករំលែកបន្តលើហ្វេសប៊ុកផេករបស់អ្នកនាង ប្រាសាទ ដាវីន បានឃើញមានរៀមច្បងអ្នកសិល្បៈជាច្រើនរូប បានបង្ហោះសារ និង ចេញវីដេអូ និយាយលើកទឹកចិត្តដល់បវរកញ្ញាកម្ពុជារូបនេះ ព្រមទាំងអំពាវនាវជ្រោមជ្រែងលើការបោះឆ្នោះឱ្យ ប្រាសាទ ដាវីន បាន Top 10 Voice For Change នៃកម្មវិធី Miss Universe នេះដែរ។

ក្រោយពីបានឃើញសន្ទុះនៃការគាំទ្រលើកទឹកចិត្តខ្លាំងពីមហាជនបងប្អូនខ្មែរ ជាពិសេសអ្នកសិល្បៈជាច្រើនបានជួយជ្រោមជ្រែងខ្លាំងលើការបោះឆ្នោតបែបនេះ ក៏បានឃើញអ្នកនាង ប្រាសាទ ដាវីន ចេញវីដេអូមួយនិយាយរៀបរាប់ទាំងអួលដើមកស្រក់ទឹកភ្នែកដោយក្ដីរំភើបខ្លាំង និង អរគុណចំពោះទឹកចិត្ត ក្ដីស្រឡាញ់របស់មហាជនអ្នកគាំទ្រ ព្រមទាំងបងៗសិល្បករខ្មែរជាច្រើន។

លើសពីនេះ អ្នកនាង ប្រសាទ ដាវីន ក៏បានបង្ហោះរៀបរាប់ថា ៖ «ប្រជាជនកម្ពុជា អ្នកពិតជាអស្ចារ្យណាស់ កម្លាំងសាមគ្គីរបស់មហាគ្រួសារខ្មែរពិតជាខ្លាំងក្លា ពិតជាមានអត្ថន័យខ្លាំងណាស់ អរគុណបងប្អូនដែលតែងតែនៅក្បែរ និង បន្តជ្រោមជ្រែងរហូតមក»៕

សូមទស្សនាវីដេអូខាងក្រោម៖