![កុំយល់ច្រឡំ! ស្ទីលស្លៀកពាក់ Tomboy មិនមែនកើតចេញពីមនុស្សស្រីចរិតប្រុសទេ គឺមានប្រវត្តិផ្សេង](https://www.popular.com.kh/wp-content/uploads/2024/06/Master-for-Web-17.jpg)
កុំយល់ច្រឡំ! ស្ទីលស្លៀកពាក់ Tomboy មិនមែនកើតចេញពីមនុស្សស្រីចរិតប្រុសទេ គឺមានប្រវត្តិផ្សេង
តាមធម្មតាឱ្យតែនិយាយពាក្យថា ថមប៊យ ឬ Tomboy គេនឹងសំដៅដល់មនុស្សស្រីដែលមានអត្តចរិតជាមនុស្សប្រុស និងជាមនុស្សស្រីស្រលាញ់ភេទដូចគ្នា។ ចុះចំណែក ស្ទីលស្លៀកពាក់ Tomboy ដែលមើលទៅដូចមនុស្សប្រុស តើវាកើតចេញពីមនុស្សស្រីដែលមានអត្តចរិតបែបនេះឬ?
![](https://www.popular.com.kh/wp-content/uploads/2024/06/o-scaled.jpg)
ក្រឡេកមកការលេងខ្លួនសព្វថ្ងៃ ចំពោះមនុស្សស្រីដែលចូលចិត្តហ្វេហ្សិនបែប Tomboy ជាធម្មតាតែងចូលចិត្តពាក់អាវកស្រួច, អាវក្រណាត់គុណក្រឡា, អាវក្រណាត់បិទឡេវ, អាវ hoodies, ពាក់មួយកន្តឹប និងស្លៀកខោខូវប៊យជើងធំ ឬខោខូវប៊យបុរស (boyfriend jeans)។ ជាពិសេស មិនភ្លេចឡើយនូវការពាក់ស្បែកជើងឃ្លុបកវែង។ រាប់តាំងពីស្ទីលស្លៀកពាក់តាមដងវិថី (streetwear) រហូតដល់ហ្វេហ្សិនលំដាប់ខ្ពស់ (high fashion) រសនិយមលេងខ្លួនបែប Tomboy តែងតែបោកបក់មកបង្កើតរសជាតិថ្មីនៅក្នុងឧស្សាហកម្មហ្វេហ្សិន។
មែនទែនទៅ ពាក្យថា «Tomboy» វាបានលេចឡើងតាំងពីនៅពាក់កណ្តាលសតវត្សរ៍ទី ១៦ ម្ល៉េះ។ ពាក្យនេះដំបូងឡើយវាប្រើសម្រាប់ក្មេងប្រុសដែលឈ្លើយ និងច្រងេងច្រងាង។ បន្ទាប់មកនៅក្នុងឆ្នាំ ១៩៥០ ពាក្យ Tomboy ត្រូវបានវិវត្តសំដៅទៅលើមនុស្សស្រីវិញ ដោយក្នុងន័យថា a wild, romping girl, who acts like a spirited boy ឬប្រែជារួមឱ្យស្រួលយល់ ក្មេងស្រីដែលមានអត្តចរិតដូចក្មេងប្រុស។
ដោយឡែក ចំពោះស្ទីលស្លៀកពាក់ឬហ្វេហ្សិន Tomboy វិញ វាត្រូវបានផុសឡើងនៅក្នុងយុគសម័យតន្ត្រីហ្សាសទ.វ ១៩៣០ ជាមួយស្ទីលស្លៀកពាក់របស់តារាសម្តែងស្រីអាមេរិកម្នាក់ គឺ នាង Katharine Hepburn ដែលកើតក្នុងឆ្នាំ ១៩០៧ រហូតដល់ឆ្នាំ ២០០៣។ ស្ទីលរបស់នាងគឺស្លៀកខោក្រណាត់ជើងវែង និងទុកសក់ខ្លី ដែលសម័យនោះគេចាត់ទុកវាមិនមែនជាការស្លៀកពាក់របស់មនុស្សស្រី ខណៈដែលមនុស្សស្រីសម័យនោះគេនិយមស្លៀកពាក់ រ៉ូប ស្រោមបារ និងអាវរឹតរាង។
![](https://www.popular.com.kh/wp-content/uploads/2024/06/130405152239-tomboys-02.jpg)
យ៉ាងណាមិញ ស្ទីល Tomboy ត្រូវបានយកមកបើកទំព័រនៅក្នុងឧស្សាហកម្មហ្វេហ្សិន ដោយស្ត្រីជនជាតិបារាំងម្នាក់ឈ្មោះ Gabrielle Bonheur ឬ គេច្រើនស្គាល់ឈ្មោះថា Coco Chanel។ នាងបានរំដោះស្ត្រីនាប៉ែកអឺរ៉ុបចេញពីការស្លៀកពាក់អាវរឹតរាង(Corset) និងសំពត់។ ហើយនាងក៏ជាមាតាបង្កើតម៉ាកយីហោ Chanel ដែលជាម៉ាកហ្វេហ្សិនល្បីល្បាញពាសពេញពិភពលោកផងដែរ។
![](https://www.popular.com.kh/wp-content/uploads/2024/06/000-3.jpg)
![](https://www.popular.com.kh/wp-content/uploads/2024/06/entertainment-2013-08-coco-chanel-2-main.webp)
ហ្វេហ្សិន Tomboy មានការស្លៀកពាក់បែបរលុងស្រួលខ្លួន និងមានផាសុកភាព ដោយប្រើខោកាគីជើងធំ (baggy khakis) ស្លៀកជាមួយអាវយឺត និងពាក់មួយកន្តឹប។ លើសពីនេះមានពាក់អាវរលុងៗដែលមានការឌីហ្សាញក្រណាត់បោះពុម្ពគុណក្រឡាផងដែរ។ ជាទូទៅសម្លៀកបំពាក់ Tomboy ត្រូវតែមានអាវគុណក្រឡា និងអាវសាច់ចាក់គ្របពីលើ។
ការវិវឌ្ឍន៍ជាបន្តបន្ទាប់នៃហ្វេហ្សិន Tomboy បានរួមបញ្ចូលធាតុពីហ្វេហ្សិនផ្សេងៗដូចជា សម្លៀកបំពាក់លើដងវិថី (streetwear)និងសម្លៀកបំពាក់កីឡា (sportwear) ដោយមានប្រើអាវ hoodies, ខោកីឡារឹបជើង (sweatpants) និងស្បែកជើងកីឡា…ជាដើម។ ចំពោះគ្រឿងលម្អអាចប្រើជាការតាបស្ពាយក្រោយផងដែរ។ ពេលស្លៀកពាក់បែប Tomboy យើងនឹងមើលមកមានលក្ខណៈ សាមញ្ញនិយម ស្រួលខ្លួន និងបែបកីឡា ហើយស្ទីលមួយនេះវាតែងតែជាហ្វេហ្សិនដ៏មានប្រជាប្រិយភាពចំណោមអ្នកដែលឱ្យតម្លៃទៅលើផាសុកភាព និងពហុមុខងារនៃទំនោរហ្វេហ្សិន។
![](https://www.popular.com.kh/wp-content/uploads/2024/06/Casual-Tomboy-Allsaints-1.jpg)
![](https://www.popular.com.kh/wp-content/uploads/2024/06/Leather-Jacket-Utility-Pants-Tomboy-Outfit-UO.jpg)
![](https://www.popular.com.kh/wp-content/uploads/2024/06/Blazer-Trousers-Tomboy-Outfit-Allsaints.jpg)
ជារួមមក ពាក្យថា Tomboy ដំបូងឡើយវាជាពាក្យប្រើទៅលើក្មេងប្រុសដែលឈ្លើយ និងច្រងេងច្រងាង ហើយក្រោយមក វាបានប្រើសំដៅទៅមនុស្សស្រីដែលមានអត្តចរិតដូចមនុស្សប្រុសវិញ។ ចំណែកស្ទីលស្លៀកពាក់ ឬហ្វេហ្សិន Tomboy វាកើតចេញពីតារាសម្តែងស្រីអាមេរិក និងត្រូវបានម្ចាស់ម៉ាកសម្លៀកបំពាក់ Chanel យកមកបង្កើតជាទំនោរ ឬ Trend នៅក្នុងឧស្សាហកម្មហ្វេហ្សិន។ ដូចនេះហ្វេហ្សិន Tomboy មិនមែនកើតចេញពីមនុស្សស្រីអត្តចរិតប្រុសនោះទេ តែវាជាការស្លៀកពាក់មួយរបស់មនុស្សស្រីដែលរួមបញ្ចូលភាពជាបុរស ឬប្រើសម្លៀកបំពាក់បុរសមកលេងខ្លួននៅលើខ្លួនមនុស្សស្រី។ តែយ៉ាងណាមិញ មកដល់បច្ចុប្បន្ន ហ្វេហ្សិន Tomboy បានក្លាយជាស្ទីលពេញនិយមទាំងមនុស្សស្រី និងមនុស្សស្រីអត្តចរិតមនុស្សប្រុស ឬ Tomboy។ សូម្បីតារាល្បីៗលំដាប់ពិភពលោកដូចជា Rihanna, Tylor Swift, Kristen Stewart, Gigi Hadid និងតារាជាច្រើនរូបទៀត ក៏ចូលចិត្តលេងខ្លួនបែប Tomboy ផងដែរ៕
![](https://www.popular.com.kh/wp-content/uploads/2024/06/Plaid-Flannel-Shirt-Shorts-Tomboy-Outfit-FP.jpg)
![](https://www.popular.com.kh/wp-content/uploads/2024/06/Sweater-Vest-Tomboy-Outfit-Allsaints-1.jpg)
![](https://www.popular.com.kh/wp-content/uploads/2024/06/Hoodie-Jeans-Tomboy-Outfit-Gap.jpg)
![](https://www.popular.com.kh/wp-content/uploads/2024/06/Bomber-Jacket-Cargo-Pants-Tomboy-Outfit-FP.jpg)