ពុទ្ធោ! អតីតតារាចម្រៀងយ៉េយ៉េ អ៊ុំ គន្ធា ទទួលមរណភាពហើយ

បើរំឭកដល់តារាចម្រៀងយ៉េយ៉េកាលប្រមាណជាង ២០ ឆ្នាំ មុន ច្បាស់ណាស់មហាជននិយមវិស័យសិល្បៈប្រាកដជានៅចាំ អ្នកនាង អ៊ុំ គន្ធា ជាក់ជាមិនខាន។ រយៈពេលជាច្រើនឆ្នាំមកនេះ អតីតតារាចម្រៀងយ៉េៗដ៏ល្បីល្បាញរួបនេះ ក៏បានបាត់មុខឈឹងលើវិថីសិល្បៈហើយ ដោយទើបតែប្រមាណជា ប៉ុន្មានឆ្នាំចុងក្រោយនេះប៉ុណ្ណោះ ដែលលេចវត្តមានអ្នកនាងមកវិញជាមួយដំណឹងថា អ្នកនាងធ្លាក់ខ្លួនឈឺធ្ងន់ជាជំងឺសង្គម។

យ៉ាងណាមិញ រយៈពេលប៉ុន្មានឆ្នាំកន្លងទៅ មហាជនក៏បានឃើញមុខរបស់អ្នកនាង អ៊ុំ គន្ធា ជាថ្មី តាមរយៈការបង្ហោះលើបណ្តាញសង្គមហ្វេសប៊ុក ដោយអ្នកនាង អ៊ុំ គន្ធា ត្រូវបានគេមើលឃើញថា ពេលនេះរូបនាងបានប្រែប្រួលរូបសម្រស់ជាខ្លាំង ចំណែកឯជីវភាពវិញ ក៏ពិបាកមិនដូចមុននោះឡើយ។

ដោយឡែក កាលពីថ្ងៃទី ១៧ ខែវិច្ឆិកា ឆ្នាំ ២០២៤ កន្លងទៅនេះ មហាជនមានក្តីរន្ធត់ចិត្តយ៉ាងខ្លាំង ក្រោយពីមានសិល្បករ សិល្បការិនីជាច្រើនរួមមាន អ្នកនាង ខាត់ សុឃីម និង លោក អ៊ឺម ជីវ៉ា បានប្រកាសដំណឹងមរណភាពរបស់អ្នកនាង អ៊ុំ គន្ធា ដែលបានលាចាកលោកហើយ។

គួររំឭកផងដែរថា អ្នកនាង អ៊ុំ គន្ធា គឺជាតារាចម្រៀងយ៉េៗម្នាក់ដែលត្រូវបានមហាជនចាត់ទុកជាតារាស្រីមានសម្រស់ស្រស់ស្អាត សិចស៊ី និង មានរូបរាងតូចច្រឡឹងក្នុងសង្គមសិល្បៈម្នាក់កាលពីជំនាន់ឆ្នាំ ៩០ ហើយតាមរយៈរូបរាង និង ការលេងខ្លួនសិចស៊ី រួមជាមួយការច្រៀងតែបទយ៉េៗញាក់កន្ត្រាក់អារម្មណ៍នោះ បានធ្វើឱ្យកេរ្តិ៍ឈ្មោះអ្នកនាងឡើងដល់កម្រិតកំពូល ក្លាយជាតារាចម្រៀងស្រីសិចស៊ីល្បីល្បាញក្នុងប្រទេស៕