ឡុងចុងអស់! ឡាយលក់ម៉ាស៊ីនបោកខោអាវ ២០ នាទី គេសម្រុកទិញរាប់ម៉ឺន ខំអរស្មានខ្លួនឯងពូកែលក់ តាមពិតដាក់តម្លៃខុស

ពិតជារឿងរ៉ាវមួយដ៏គួរឱ្យហួសចិត្តណាស់ សម្រាប់ហាងលក់គ្រឿងអគ្គិសនីមួយកន្លែងនៅប្រទេសចិន ដែលបានឡាយលក់ម៉ាស៊ីនបោកខោវ ខំតែអរព្រោះមានមនុស្សកុម៉្មង់ទិញភ្លូកទឹកភ្លូកដី តាមពិតមកច្រឡំដាក់តម្លៃខុសសោះ។

តាមព័ត៌មានបានឱ្យដឹងថា ហាងខាងលើនេះបានឡាយលក់ម៉ាស៊ីនបោកខោអាវនៅតាមបណ្តាញសង្គម ហើយចៃដន្យបានតាំងតម្លៃខុស គឺថោកជាងតម្លៃដើមរហូតដល់ ៤០ ទៅ ៥០ ភាគរយឯណោះ។ យ៉ាងណាមិញ ឃើញបែបនេះហើយមហាជនក៏បាននាំគ្នាសម្រុកកុម្ម៉ង់ទិញយ៉ាងភ្លូកទឹកភ្លូកដី គឺត្រឹមតែ ២០ នាទី មានទៅដល់ ៤០០០០ ការកុម្ម៉ង់ឯណោះ ដែលតម្លៃសរុប​ ៤០ លានយ័ន ស្មើប្រមាណ ៥.៦ លានដុល្លារ ទាំងដែលតម្លៃសរុបរួមទាំងការចំណេញគឺគួរតែបាន ៧០ លានយ័ន ស្មើប្រមាណ ៩.៨​ លានដុល្លារ ពោលគឺខាតសឹងតែពាក់កណ្តាលទៅហើយ។

បន្ទាប់ពីមានការយល់ច្រឡំនេះ ចុងក្រោយខាងហាងក៏បានចេញវីដេអូសុំទោសអតិថិជន ព្រមទាំងសុំឱ្យពួកគេបញ្ឈប់ការកុម្ម៉ង់ទិញ ក្នុងនោះក៏មានអ្នកខ្លះបានបញ្ឈប់ផងដែរ តែមានអ្នកខ្លះក៏ព្យាយាមលក់តក្នុងតម្លៃខ្ពស់ ដែលរឿងនេះតម្រូវឱ្យមានខាងអាជ្ញាធរពាក់ព័ន្ធចូលរួមដោះស្រាយ៕