ស្ងាត់ជាងមួយឆ្នាំ! Zhang Zhehan បញ្ចេញចម្រៀងដំបូងផ្ទុះការគាំទ្រខ្លាំង ជាប់លើតារាងកំពូល iTunes
ដូចអ្នកគាំទ្របានស្គាល់មកហើយ តារាសម្ដែងប្រុសរបស់ចិន Zhang Zhehan គឺជាតួអង្គសម្ដែងក្នុងរឿង «Word Of Honor» ដែលទទួលបានប្រជាប្រិយភាពយ៉ាងខ្លាំងក្នុងវិស័យភាពយន្តចិន មុនពេលកើតមានរឿងអាស្រូវនៅទីសក្ការបូជា Yasukuni ដ៏ក្តៅគគុកកន្លងទៅនោះ។
រំឭកបកក្រោយបន្តិច កាលនោះតារាប្រុសរូបនេះបានទៅប្រទេសជប៉ុន ដើម្បីចូលរួមមង្គលការរបស់មិត្តភក្តិ ហើយក៏បានទៅទស្សនានៅទីសក្ការបូជា Yasukuni និង បានថតរូប Selfie ទុកជាអនុស្សាវរីយ៍ ដែលតាមរយៈនេះហើយបានធ្វើឱ្យមហាជនអ្នកនិយមលេងបណ្តាញសង្គមរិះគន់ថា លោកគឺជាអ្នកគាំទ្រជប៉ុន និង ចាត់ទុកជាអ្នកសិល្បៈមិនល្អ ហើយហាមឃាត់មិនឱ្យផ្សព្វផ្សាយក្នុងប្រទេសចិន ។
ទោះជាយ៉ាងណា បន្ទាប់ពីបានបាត់ខ្លួនជាង ១ឆ្នាំក្នុងវិស័យសិល្បៈ Zhang Zhehan ក៏បានបញ្ចេញនូវបទចម្រៀងដំបូងរបស់លោក ចំណងជើង «Sad Sunshine Is Here» ហើយជាលទ្ធផលគឺលោកទទួលបានការគាំទ្រយ៉ាងខ្លាំងរហូតដល់បទចម្រៀងដំបូងរបស់លោក បានឈរនៅលើតារាងកំពូល Worldwide iTunes រយៈពេល ៥ ថ្ងៃ គិតត្រឹមថ្ងៃទី ១៨ ខែធ្នូ ឆ្នាំ២០២២។
ក្នុងនោះដែរ ក្រុមអ្នកគាំទ្រចិនរបស់លោកបានសម្ដែងក្តីរំភើប និង សាទរយ៉ាងខ្លាំង ដោយបានបង្ហោះសារអបអរដល់ Zhang Zhehan នៅលើបណ្តាញសង្គម Weibo ថែមទៀតផង៕
