តិចអត់ដឹង! កំពូលតារាហុងកុង Vincent Wong មានប្អូនប្រុសម្នាក់ សង្ហាណាស់ ហើយធ្លាប់ថតរឿងនៅ TVB ទៀត
ដូចដែលប្រិយមិត្តអ្នកគាំទ្រនិយមតាមដានព័ត៌មានទាក់ទងនឹងតារាហុងកុងរបស់ TVB បានដឹងខ្លះៗមកហើយ អំពីតារាសម្ដែងប្រុស Vincent Wong ដែលលោកបានចូលជាតារាប្រចាំ TVB ក្នុងឆ្នាំ ២០០៨ ហើយបានបង្ហាញស្នាដៃក្នុងខ្សែភាពយន្តភាគជាច្រើនរហូតឈានដល់តំណែងជាតួឯកប្រុសនាំមុខរបស់ស្ថានីយ៍។
តារាសម្ដែង Vincent Wong បានឈ្នះពានរង្វាន់តារាសម្ដែងឆ្នើមរបស់ TVB ក្នុងកម្មវិធី «TVB Anniversary Awards» ក្នុងឆ្នាំ ២០១៧ នេះគឺជាជោគជ័យរយៈពេល ៩ ឆ្នាំរបស់លោក។ ជាមួយនឹងការប្រឹងប្រែងដើរមកដល់ចំណុចកំពូលមួយដែលជាកន្លែងដែលគេចង់បាន។
យ៉ាងណាមិញ ឥឡូវនេះ យើងនឹងបើកបង្ហាញមុខមាត់ដ៏សង្ហារបស់ប្អូនប្រុសបង្កើតរបស់ Vincent Wong ដែលមានឈ្មោះថា Tony Wong ដោយរំពឹងថាលោកអាចនឹងដើរតាមគន្លងរបស់បងប្រុសទៅថ្ងៃអនាគត។
បើនិយាយដល់ Tony Wong តាមពិតទៅកាលពីប៉ុន្មានឆ្នាំមុន លោកក៏បានធ្វើឱ្យទស្សនិកជនមានការភ្ញាក់ផ្អើលម្ដងមកហើយ។ សម្រាប់ការបង្ហាញខ្លួនចូលរួមក្នុងកម្មវិធីប្រកួតជុំដំបូងក្នុងការប្រកួតប្រជែងប្រចាំឆ្នាំរបស់ «Mr Hongkong» ក្នុងឆ្នាំ ២០១៦។
ទោះយ៉ាងណា Tony បានសម្រេចបោះបង់ចោលសិទ្ធិក្នុងការប្រកួតភ្លាមៗ បន្ទាប់ពីបានលើកឡើងអំពី «បញ្ហាសុខភាព»។ ទោះបីជាពេលនោះ គាត់ដកខ្លួនចេញពីការប្រកួតក៏ដោយ TVB បានផ្តល់កិច្ចសន្យាឱ្យ Tony ចូលរួមការងារជាមួយនៅក្នុងឆ្នាំ ២០១៧ ហើយលោកបានបង្ហាញខ្លួនក្នុងកម្មវិធីមួយចំនួនរបស់ TVB និងបានថតសម្ដែងក្នុងរឿង «Flying Tiger» ផងដែរ៕
