ក្ដៅដូចបាយពុះ! Wang Churan ត្រូវគេប្រទះឃើញចេញចូលសណ្ឋាគារដែល Yang Yang ស្នាក់នៅ ៣ ថ្ងៃជាប់គ្នា

ថ្មីៗនេះ ប្រធានបទថ្មីមួយកំពុងផ្ទុះការវែកញែកយ៉ាងក្ដៅគគុកនៅក្នុងប្រទេសចិន ក្រោយអ្នកប្រមាញ់រូបសិល្បករដ៏ល្បីនៅចិនម្នាក់ឈ្មោះ Liu Da Chui បានលួចផ្តិចយករូបភាពបាន តារាស្រី Wang Churan ចំណាយពេល ៣ យប់នៅបន្ទប់សណ្ឋាគាររបស់តារាប្រុស Yang Yang នាក្រុងសៀងហៃ កាលពីខែមេសាកន្លងទៅ។

តាមអ្នកប្រមាញ់រូបខាងលើនេះ កាលពីថ្ងៃទី ២២ ខែមេសា ឆ្នាំ ២០២៣ កន្លងទៅ តារាសម្ដែងស្រីរូបស្រស់ Wang Churan ត្រូវបានថតជាប់កំពុងជួបគ្នាជាមួយជំនួយការរបស់តារាប្រុស Yang Yang នៅកន្លែងចំណតឡានក្នុងសណ្ឋាគារ។ ក្រោយមក ជំនួយការរូបនោះ ក៏បាននាំនាង ឡើងទៅខាងលើចូលបន្ទប់របស់ Yang Yang។

អ្នកប្រមាញ់រូបដដែលបានបន្តទៀតថា Wang Churan ក៏បានចេញពីសណ្ឋាគារវិញនៅព្រឹកបន្ទាប់ ក្រោយជំនួយការនាងមកយក មុនពេលពួកគេត្រឡប់មកសណ្ឋាគារវិញនៅថ្ងៃដដែលនោះ។ មួយថ្ងៃក្រោយមកទៀត Churan ក៏ប្រទះឃើញដើរចូលសណ្ឋាគារនោះជាថ្មី ប៉ុន្តែលើកនេះមានកាតសោចូលបន្ទប់ដោយខ្លួនឯង។ រហូតមកដល់ថ្ងៃទី ២៥ ខែមេសា Yang Yang ត្រូវបានប្រទះឃើញចេញពីសណ្ឋាគារនោះជាមួយជំនួយការរបស់លោក។

គួររំឭកផងដែរថា នេះមិនមែនជាលើកទី ១ ឡើយ ដែលតារាល្បីទាំង ២ រូបនេះ ជាប់ជំពាក់ជំពិននឹងចចាមអារ៉ាមស្នេហានេះ។ ជាក់ស្ដែង កាលពីខែមីនា កន្លងទៅ ក៏មានមហាជនម្នាក់ ទម្លាយថារូបគេបានឃើញ Churan និង Yang Yang ចំណាយពេលជាមួយគ្នាក្នុងរីស៊តមួយកន្លែងនៅ Maldives ផងដែរ៕