អ្នកគាំទ្រផ្អើលលាន់មាត់ព្រាត ពេលឃើញ Pon Nawash បង្ហោះរូប Lisa លើគណនីអ៊ីនស្តាក្រាម

ប្រិយមិត្តច្បាស់ជាស្គាល់ជាក់ជាពុំខាន តារាប្រុសពន្លកថ្មីប្រចាំប៉ុស្តិ៍ទូរទស្សន៍លេខ ៣ ថៃ លោក Pon Nawash ដែលជាតារាប្រុសម្នាក់កំពុងតែទទួលបានប្រជាប្រិយភាពខ្លាំងនាពេលនេះ។ ជាមួយនឹងរូបសម្រស់ និង សមត្ថភាពសម្ដែង ជារឿយៗតារាប្រុសរូបនេះតែងត្រូវបានមហាជនក្នុង និង ក្រៅប្រទេសស្រឡាញ់ពេញចិត្តខ្លាំង។

បច្ចុប្បន្នអ្នកកំលោះរូបនេះមានអាយុ ២៦ ឆ្នាំ តែបើនិយាយពីរឿងស្នេហាអ្នកកំលោះ Pon មិនធ្លាប់បង្ហើបឡើយថាពេញចិត្តនរណានោះទេ តែកន្លងមក Pon ធ្លាប់និយាយពីតារាស្រីដែលលោកពេញចិត្តប្រាប់ដល់មហាជននោះ គឺកំពូលតារាស្រីថៃ នាង Lisa សមាជិកក្រុមចម្រៀង K-Pop Black Pink។

តួយ៉ាងថ្មីៗ ស្រាប់តែតារាសម្ដែង Pon បានចេញមកបង្ហោះរូបតារាស្រី Liza លើគណនីអ៊ីនស្តាក្រាមរបស់ខ្លួន។ ជាមួយនឹងការបង្ហោះរូបភាពនេះឡើង គេឃើញថាមហាជនជាច្រើនបានចូលទៅបញ្ចេញមតិលើកទឹកចិត្តឱ្យ Pon តាមសុំស្នេហ៍តារាស្រី Liza ព្រោងព្រាត។ ដូចគ្នានោះ ក៏មានអ្នកគាំទ្រខ្លះបានសរសើរថា Pon និង តារាស្រី Lisa សមគ្នាថែមទៀតផង ដោយចង់ឃើញតារាប្រុសស្រីគូនេះមានស្នាដៃរួមគ្នាម្តងប្រសិនមានឱកាស៕