ល្បីស្នេហ៍ស្អិតនឹងតារាស្រីល្បី ៦ នាក់ ឥលូវ Li Yifeng រកតែម្នាក់កៀកដៃដើរលេងគ្មាន
តារាសម្ដែងចិន លោក Li Yifeng ឬ Evan Li ជាតារាសម្ដែងល្បីឈ្មោះមួយរូប មានរូបរាងខ្ពស់សង្ហា និង មានសមត្ថភាព ទេពកោសល្យក្នុងការសម្ដែងខ្លាំងមិនធម្មតា ។
តារាប្រុសវ័យ ៣៤ ឆ្នាំរូបនេះ ត្រូវបានអ្នកគាំទ្រទទួលស្គាល់ពីសមត្ថភាពសម្ដែងដ៏ប៉ិនប្រសប់ ក្នុងរឿងភាគជាច្រើនរបស់លោក និង តែងលួចសរសើរមិនដាច់ពីមាត់នូវរូបសម្បត្តិដ៏ស្រស់សង្ហា ស័ក្តិសមជាតួឯកប្រុសក្នុងដួងចិត្តទស្សនិកជនជាច្រើន ។
ទោះបីជាយ៉ាងណា អ្នកគាំទ្រមិនត្រឹមតែតាមខ្វល់ខ្វាយអំពីអាជីពរបស់ Li Yifeng ប៉ុណ្ណោះទេ ប៉ុន្តែថែមទាំងចង់ដឹងអំពីមិត្តស្រីរបស់លោកទៀតផង ។ តើតារាស្រីរូបណាខ្លះធ្លាប់ជាម្ចាស់ស្នេហ៍របស់តារាប្រុសសង្ហានេះកាលពីមុន ។
១). តារាសម្ដែងស្រីកូរ៉េ Lee Da Hae
តារាប្រុសរូបនេះ បានសារភាពពីទំនាក់ទំនងស្នេហានឹងតារាសម្ដែងកូរ៉េ Lee Da Hae ក្នុងពិធីសម្ពោធរឿង «Sword of Legends» ប៉ុន្តែគួរឱ្យសោកស្តាយស្នេហារបស់អ្នកទាំងពីរបានបែកបាក់ ហើយលោកក៏បានព្យាយាមទៅកាន់ប្រទេសកូរ៉េខាងត្បូង ដើម្បីផ្សះផ្សាគ្នាដែរ ប៉ុន្តែនៅតែមិនអាចស្រោចស្រង់ទំនាក់ទំនងមួយនេះបាន ។ គួរបញ្ជាក់ផងដែរថា Lee Da Hae គឺជាមនុស្សស្រីតែម្នាក់គត់ ដែលតារាប្រុសរូបនេះ សារភាពពីទំនាក់ទំនងស្នេហាជាសាធារណៈ ។
២). តារាចម្រៀង និង សម្ដែងស្រី Li Feier
ធ្លាប់មានពាក្យចចាមអារ៉ាមស្នេហារវាង Li Yifeng និង Li Feier ក្រោយពីអ្នកនិយមលេងបណ្ដាញសង្គម បានបញ្ចេញភស្តុតាងជាច្រើនរាប់មិនអស់អំពីទំនាក់ទំនងរបស់ពួកគេ ។ ជាពិសេស គឺចិញ្ចៀនគូស្នេហ៍ពាក់ជាប់នឹងដៃរបស់ Li Yifeng និង តារាស្រីរូបនេះ ប៉ុន្តែទោះជាយ៉ាងនេះក្តី ក៏មិនមានការបញ្ជាក់ពីសាមីខ្លួនទាំងពីរនោះដែរ ។
៣). តារាសម្ដែងស្រី Li Qin
តារាសម្ដែងស្រីចិន Li Qin ឬ ត្រូវបានគេស្គាល់ថា Sweet Li នាងក៏ធ្លាប់មានរឿងចចាមអារ៉ាមស្នេហាជាមួយនឹង Li Yifeng ផងដែរ បន្ទាប់ពីអ្នកទាំងពីរបានសម្ដែងរឿង «Return of the Heiress» ជាមួយគ្នា ព្រោះមានឈុតឆាកស្នេហាផ្អែមល្ហែមជាច្រើនក្នុងរឿងនេះ ។ ទោះជាមានពាក្យចចាមអារ៉ាមស្នេហាយ៉ាងណាក៏ដោយ ក៏តារាប្រុសស្រីទាំងពីររូបនេះ នៅតែមិនមានការឆ្លើយតបចំពោះស្នេហានោះទេ ។
៤). តារាសម្ដែងស្រី Wu Xin
តារាសម្ដែងស្រីចិន Wu Xin ឬ ត្រូវបានគេស្គាល់ថា Orfila Wu ក៏ធ្លាប់មានរឿងចចាមអារ៉ាមស្នេហាក្តៅគគុកជាមួយនឹង Yifeng ដែរ ។ យ៉ាងនេះក្តី មួយគូនេះមានអ្នកគាំទ្រភាគច្រើនមិនសូវជាគាំទ្រស្នេហារបស់ពួកគេប៉ុន្មាននោះទេ ។ ទាក់ទងនឹងពាក្យចចាមអារ៉ាមនេះ ក៏មិនមានការឆ្លើយតបណាមួយនៅឡើយទេ រហូតមកដល់ពេលនេះ ។
៥). តារាសម្ដែងស្រី Jiang Shuying
តារាសម្ដែងស្រីចិនរូបនេះ ក៏ធ្លាប់មានពាក្យចចាមអារ៉ាមស្នេហាជាមួយនឹង Yifeng ដែរ ដោយសារតែអ្នកទាំងពីរមានភាពស្និទ្ធស្នាលនឹងគ្នាខ្លាំងរហូតដល់មានការសង្ស័យពីទំនាក់ទំនង ។
៦). តារាសម្ដែងស្រី Li Chun
ក៏មិនខុសគ្នាពីតារាសម្ដែងស្រីមុនៗដែរ តារាស្រី Li Chun ធ្លាប់មានពាក្យចចាមអារ៉ាមស្នេហានឹង Yifeng ដោយសារតែអ្នកទាំងពីរបានចូលរួមសម្ដែងជាមួយគ្នាក្នុងរឿង «Guilty of Mind» ។ ថ្វីដ្បិតតែមានភាពជិតស្និទ្ធខុសពីធម្មតា ប៉ុន្តែពួកគេបានបដិសេធពីទំនាក់ទំនងនេះទាំងស្រុង ៕
