(វីដេអូ) អ៊េមណាស់! បទ «នារីជឿនលឿន» វណ្ណដា បន្លឺឡើងក្នុងកម្មវិធី The Wall Song របស់ថៃ

ដូចមហាជនបានជ្រាបមកហើយថា តារាចម្រៀងរ៉េបវ័យក្មេងរបស់ផលិតកម្មបារមី លោក វណ្ណដា មិនត្រឹមតែទទួលបានប្រជាប្រិយនៅក្នុងប្រទេសកម្ពុជានោះទេ ពោលគឺតារាចម្រៀងរ៉េបរូបនេះ ក៏មានកេរ្តិ៍ឈ្មោះល្បីសុះសាយនៅក្រៅប្រទេសខ្លាំងណាស់ដែរ។

រាល់គ្រប់ Album និង បទចម្រៀងរបស់តារាចម្រៀងរ៉េប វណ្ណដា ស្ទើរតែគ្រប់បទត្រូវបានមហាជនយុវវ័យពេញនិយមស្តាប់ថែមទៀតផង។ លើសពីនោះ ថ្មីៗនេះ វណ្ណដា ក៏ទើបតែបានសហការផលិតចម្រៀងជាមួយនឹងតារាចម្រៀងរ៉េបក្រៅប្រទេស មួយចំនួនផងដែរ។

ដោយឡែកកាលពីរាត្រីថ្ងៃទី ១៤ ខែកញ្ញា ឆ្នាំ ២០២២ កន្លងទៅ នៅក្នុងកម្មវិធីពេញនិយម «The Wall Song» ភាគទី ១០៦ របស់ WorkPoint Entertainment ប្រទេសថៃ បានធ្វើឱ្យមហាជនមានការចាប់អារម្មណ៍ និង រំភើបចិត្តយ៉ាងខ្លាំង ក្រោយបទចម្រៀងរបស់ វណ្ណដា «Queen Bee» ឬ ចំណងជើងជាភាសាខ្មែរ «នារីជឿនលឿន» បានបន្លឺឡើងក្នុងកម្មវិធីនោះ។

បទចម្រៀងរ៉េបដ៏ពេញនិយម «នារីជឿនលឿន» នោះដែរ បានបន្លឺឡើង ស្របពេលដែលវត្តមានតារាកិត្តិយស តារាស្រី May Pitchnart Sahakorn បានចេញមកបង្ហាញខ្លួន គឺមើលទៅអត្ថន័យបទចម្រៀងត្រង់ឃ្លានោះ ស៊ីចង្វាក់ ស័ក្ដិសមនឹងតារាស្រីដ៏ស្រស់ស្អាតរូបនោះណាស់។

ជាការពិតណាស់ នេះមិនមែនជាលើកទីមួយនោះទេ ដែលបទចម្រៀងរបស់លោក វណ្ណដា ត្រូវបានប្រើនៅក្នុងកម្មវិធីនានានៅឯក្រៅប្រទេស ព្រោះជារឿយៗ ក៏មានផេកធំៗល្បីៗជាច្រើន ជាពិសេសឌីជេល្បីក្រៅស្រុក ក៏បានយកបទចម្រៀងតារាចម្រៀងរ៉េប វណ្ណដា ទៅចាក់ផងដែរ៕