ទម្លាយទំនាក់ទំនងពិសេស Kaka KH និង លោក កេត សូបូរិទ្ធ តួកុនខ្មែរឆ្នាំ ៨០-៩០ អ្នកគាំទ្រមិនដែលដឹង
ប្រិយមិត្តប្រាកដជាស្គាល់យ៉ាងច្បាស់ហើយពី Kaka KH ដែលអ្នកនាងគឺជាតារាហ្វេសប៊ុកម្នាក់ដ៏ល្បីល្បាញ ដោយកន្លងមករហូតទល់បច្ចុប្បន្ននេះ អ្នកនាងតែងតែបានធ្វើវីដេអូជាច្រើន មានទាំងវីដេអូបែបកម្សាន្ត វីដេអូការឆ្លើយតបផ្សេងៗ និង វីដេអូរិះគន់ ជាដើម។
បច្ចុប្បន្ននេះ អ្នកនាង Kaka KH បានមានគ្រួសារ និង កំពុងរស់នៅឯប្រទេសអូស្ត្រាលីយ៉ាងមានសុភមង្គលផងដែរ។ យ៉ាងណាមិញ ថ្ងៃនេះយើងនឹងបង្ហាញរឿងមួយរបស់អ្នកនាង Kaka KH ដែលមានទំនាក់ទំនងជាប់ពាក់ព័ន្ធយ៉ាងស្អិតល្មួតជាមួយលោក កេត សូបូរិទ្ធ ត្រូវបានគេស្គាល់ថាជាអតីតតួកុនខ្មែរជំនាន់ឆ្នាំ ៨០-៩០ មួយរូបដ៏ល្បីល្បាញ។
ជាការពិត លោក កេត សូបូរិទ្ធ គឺជាអតីតតារាសម្ដែងដ៏ល្បីល្បាញលំដាប់ជួរមុខម្នាក់ក្នុងទសវត្សរ៍ ៨០-៩០ ដោយអតីតតារារូបនេះ បានចូលប្រឡូកក្នុងវិស័យឧស្សាហកម្មភាពយន្តខ្មែរនៅក្នុងឆ្នាំ ១៩៨៨ ហើយរឿងដែលលោកបានសម្តែងមានដូចជា រឿង «ថ្ងៃណាអូនវិលវិញ ?» រឿង «ខ្លែងឯក» រឿង «អារសាច់ជូនម្តាយ» រឿង «ស្រមោលស្នេហ៍» រឿង «ផ្កាដុះលើថ្ម» រឿង «ស្លៀកខ្យល់ដណ្តប់មេឃ» និង រឿងជាច្រើនទៀត។ លើពីនេះ លោក កេត សូបីរិទ្ធ ក៏ធ្លាប់បានចូលរួមសម្តែងចម្រៀងកាយវិការជាច្រើនបទទៀតផង។
បន្ទាប់ពីមានឈ្មោះល្បីល្បាញ ស្រាប់តែនៅឆ្នាំ ១៩៩២ លោក កេត សូបូរិទ្ធ ក៏បានលាឈប់ពីការសម្តែង ហើយបានលេចឮដំណឹងថាគាត់បានសាងគ្រួសារ និង ចេញទៅរស់នៅប្រទេសអូស្រ្តាលី រហូតមកទល់នឹងពេលបច្ចុប្បន្ន។ យ៉ាងណាកន្លងមក អតីតតារាសម្តែងរូបនេះ ក៏ធ្លាប់មកលេងប្រទេសកំណើតផងដែរ។
ងាកមកស្ថានភាពគ្រួសាររបស់លោក កេត សូបូរិទ្ធ លើទឹកដីឯនាយសមុទ្រវិញនោះ ឃើញថាលោកកំពុងតែរស់នៅយ៉ាងសុខសានជាមួយក្រុមគ្រួសារ។ សព្វថ្ងៃអតីតតួកុនខ្មែររូបនេះ មានកូន ៣ នាក់ ដែលកូនស្រីច្បង គឺជាអ្នកនាង Kaka KH តារាហ្វេសប៊ុកដ៏ល្បីល្បាញនោះឯង ដោយពេលនេះអ្នកនាងក៏បានសាងគ្រួសារ និង ថែមទៀតមានកូនម្នាក់ទៀតផង។ ចំណែកកូនប្រុសពីរនាក់ទៀតរបស់អតីតតួកុនខ្មែររូបនេះ គឺជាកូនភ្លោះ៕
ប្រភព ៖ Movies star research
