ទឹកចិត្តល្អកម្ររកបាន ហក់ផ្លោះជញ្ជាំងទៅជួយរុញស្នួខោអាវអ្នកជាប់ផ្ទះ ព្រោះខ្លាចទទឹកភ្លៀង
ថ្មីៗនេះ អ្នកលេងបណ្ដាញសង្គម TikTok ម្នាក់នៅថៃ ដែលមានឈ្មោះថា littlemonster316 បានចែករំលែកវីដេអូពីកាមេរ៉ាសុវត្ថិភាពមួយ បង្ហាញពីសកម្មភាពបុរសម្នាក់ នៅទីធ្លាខាងមុខផ្ទះរបស់នាង។
វីដេអូរយៈពេលត្រឹម ៣៨ វិនាទី របស់នាង បានផ្ទុះការចាប់អារម្មណ៍ពីអ្នកលេងបណ្ដាញសង្គមមួយនោះជាខ្លាំង ដោយមានមនុស្សចុចមើលរហូតដល់ ៥.៥ លាននាក់ក្នុងពេលត្រឹម ១ ថ្ងៃ។ អ្វីដែលធ្វើឱ្យមហាជនជាច្រើនចាប់អារម្មណ៍លើវីដេអូនោះ គឺសកម្មភាពបុរសម្នាក់ពាក់អាវពណ៌ក្រហម បានហក់ផ្លោះតាមជញ្ជាំងពីផ្ទះរបស់លោក ទៅកាន់ផ្ទះរបស់ម្ចាស់គណនី TikTok ខាងលើ។ ក្រោយមកទៀត លោកក៏បានធ្វើសកម្មភាពដើរទៅកាន់ស្នួខោអាវ រួចហើយក៏រុញស្នួនោះចូលមកក្នុង។
បន្ទាប់នោះមក លោកក៏បានឈរមួយសន្ទុះ សម្លឹងមើលថា ភ្លៀងនៅសាចទទឹកខោអាវទៀតឬអត់ ហើយក្រោយឃើញថានៅសាច លោកក៏បានរុញស្នួចូលទៅក្នុងបន្ថែមទៀត មុនហក់ឡើងជញ្ជាំងទៅផ្ទះរបស់លោកវិញ។
ទង្វើរបស់បុរសរូបនោះ មិនត្រឹមតែទទួលបានការអរគុណពីម្ចាស់ផ្ទះប៉ុណ្ណោះទេ រូបលោកក៏ទទួលបានការកោតសរសើរពីទឹកចិត្តរបស់លោកយ៉ាងខ្លាំងក្លាពីសំណាក់មហាជនផងដែរ។ យ៉ាងណាមិញ បើតាមការបញ្ជាក់ពីម្ចាស់ផ្ទះក្នុងខមមិនថា បុរសចិត្តល្អរូបនោះ គឺមិនមែនជាអ្នកជិតខាងនាងនោះឡើយ ប៉ុន្តែជាជាងឈើ ដែលធ្វើការឱ្យអ្នកជិតខាងរបស់នាង៕
