(វីដេអូ) ស្មានមិនដល់ ជួបគ្នាលើកដំបូង Jun Ji Hyun និង Son Heung Min និយាយគ្នាយ៉ាងស្និទ្ធស្នាល
តារាសម្ដែងស្រី Jun Ji Hyun កំពុងតែទទួលបានការគាំទ្រយ៉ាងគគ្រឹកគគ្រេង ពីសំណាក់អ្នកគាំទ្រស្ទើរពាសពេញពិភពលោក ជាពិសេសគឺនៅពេលដែលនាងសម្ដែងក្នុងរឿង «My Love From the Star» និងរឿង «The Legend of the Blue Sea» ជាដើម។ល។ រីឯ លោក Son Heung Min គឺជាកីឡាករបាល់ទាត់ដែលលេងឱ្យក្រុម Tottenham Hotspur ហើយក៏ជាប្រធានក្រុមជម្រើសជាតិកូរ៉េ ដែលមកទល់ពេលនេះ លោកក៏កំពុងតែទទួលបានប្រជាប្រិយភាពយ៉ាងខ្លាំងគួរឱ្យកត់សម្គាល់។
យ៉ាងណាមិញ កាលពីថ្ងៃទី២០ ខែកុម្ភៈ ឆ្នាំ២០២៣ កន្លងទៅ កំពូលតារាជួរមុខលំដាប់ប្រទេសទាំង ២ ពោលគឺនាង Jun Ji Hyun និងលោក Son Heung Min បានចូលរួមក្នុងកម្មវិធី «Burberry 2023 F/W Collection» នៅឯ London Fashion Week ទីក្រុងឡុងដ៏ ប្រទេសអង់គ្លេស ហើយក៏បានជួបគ្នានៅទីនោះតែម្ដង។
វីដេអូជាច្រើនរបស់តារាទាំងពីរ ថតរូបជាមួយគ្នាក្នុងកម្មវិធីនារាត្រីនោះ ត្រូវបានបង្ហោះចូលទៅក្នុងបណ្ដាញសង្គម IG ដោយទាក់ទាញបានការចាប់អារម្មណ៍ និង រំភើបជាខ្លាំងពីអ្នកគាំទ្រជុំវិញពិភពលោក។
រីឯ ការបង្ហោះរបស់វីដេអូមួយទៀត បានបង្ហាញពីសកម្មភាពអ្នកទាំងពីរកំពុងជជែកគ្នាយ៉ាងស្និទ្ធស្នាល ខណៈដែល Jun Ji Hyun និយាយទៅកាន់ កំពូលកីឡាបាល់ទាត់ Son Heung Min ថា៖ «អរគុណច្រើនសម្រាប់ការថតរូបមួយនេះ»។ បន្ទាប់មក លោកក៏បានឆ្លើយតបថា៖ «មិនអីទេ នេះជាអ្វីដែលខ្ញុំគួរតែធ្វើហើយ»។
នៅពេលនោះ មិនទាន់ចប់សន្ទនានៅឡើយទេ តែ Jun Ji Hyun ក៏បានបន្ថែមទៀតថា៖ «ខ្ញុំជាអ្នកគាំទ្ររបស់លោកអស់ពីចិត្តតែម្ដង» ដោយ Son Heung Min បានឆ្លើយតបវិញជាមួយទឹកមុខយ៉ាងអៀនថា៖ «អរគុណខ្លាំងណាស់ វាជាកិត្តិយសរបស់ខ្ញុំបាទ!»៕
ចុចទីនេះដើម្បីទស្សនាវីដេអូ៖ (វីដេអូទី ១); (វីដេអូទី ២)
