ទីបំផុត Violette ម្ចាស់បទ «Smoke» បកស្រាយហើយ ក្រោយផ្ទុះរឿងបែកពីសង្សារ

អស់រយៈពេលជិត ៥ ឆ្នាំមកហើយ ដែលតារាសម្ដែង និង ចម្រៀងលោក Koa Jirayu និង តារាចម្រៀងស្រីស្រស់ Violette Wautier បានក្លាយជាសង្សារនឹងគ្នា។ យ៉ាងណាមិញ ថ្មីៗនេះក៏ស្រាប់តែផ្ទុះការភ្ញាក់ផ្អើលជាខ្លាំង ដោយមានលេចឮពាក្យថាមានថាគូស្នេហ៍មួយគូបានចែកផ្លូវគ្នាស្ងាត់ៗ ក្រោយពីមានគណនីហ្វេសប៊ុកផេគមួយឈ្មោះថា Jmoy 108 បានចេញបង្ហោះថា ខណៈនេះមានគូស្នេហ៍អ្នកសិល្បៈថៃមួយគូទៀតហើយកំពុងតែចែកផ្លូវគ្នា។ ក្រោយពីមានការបង្ហោះពីផេគល្បីមួយនេះឡើងដូច្នោះ គឺមហាជនបានដាក់ការសង្ស័យចំពោះគូស្នេហ៍ Koa និង Violette នេះឯង។

ក្នុងនោះសម្រាប់មូលហេតុដែលនាំឱ្យមហាជនផ្ទុះការសង្ស័យ ក៏ព្រោះថាមួយរយៈចុងក្រោយនេះ តារាស្រីប្រុសគូនេះហាក់ដាច់ឆ្ងាយពីបណ្ដាញសង្គម មិនថាអ៊ីនស្ត្រាក្រាម ឬ ហ្វេសប៊ុក ពោលគឺពុំសូវជាបង្ហាញភាពផ្អែមល្ហែមឡើយ។ ទន្ទឹមនឹងមានការសង្ស័យច្រើនពីមហាជន តារាស្រី Violette ក៏ប្រញាប់ចេញមុខបកស្រាយភ្លាមៗផងដែរ។

យោងតាមការបង្ហោះសាររបស់ស្រីស្រស់ Violette បានសរសេរថា ៖ «មិនមែនជាគូស្នេហ៍ខ្ញុំឡើយ (មានន័យថាពួកគេមិនបានបែកគ្នាទេ) រាល់ថ្ងៃនេះពួកយើងស្រឡាញ់គ្នាណាស់ សូមអនុញ្ញាតកាត់រឿងមួយនេះចេញពីការសង្ស័យ ព្រោះខ្លាចលោកយាយទូរសព្ទមកសាកសួរដូចលើកមុនទៀត ដោយហេតុថាគាត់ឆាប់ជឿព័ត៌មានជាងចៅខ្លួនឯង»៕