MUC នឹងរៀបចំកន្លែងឱ្យអ្នកគាំទ្រនៅភ្នំពេញ មើលការប្រឡង ហង្ស ម៉ានីតា ថ្ងៃផ្ដាច់ព្រ័ត្រ
នៅក្នុងការប្រកួតបឋម និង វគ្គបង្ហាញឈុតតំណាងជាតិនៃកម្មវិធី Miss Universe 2022 នៅព្រឹកថ្ងៃទី ១២ ខែមករា ឆ្នាំ ២០២៣ ឃើញថាបវរកញ្ញាតំណាងប្រទេសនីមួយៗ បានដើរបញ្ចេញសមត្ថភាព បង្អួតសម្រស់រៀងៗខ្លួនជាមួយឈុតរាត្រីសមោសរ និង ឈុតប៊ីគីនី ព្រមទាំងបង្ហាញឈុតតំណាងជាតិដ៏ល្អឯករបស់ខ្លួនយ៉ាងលេចធ្លោនៅលើឆាកអន្តរជាតិដ៏អស្ចារ្យមួយនេះ។
ក្នុងវគ្គប្រកួតបឋម និង ឈុតតំណាងជាតិនេះដែរ ងាកមកបវរកញ្ញាតំណាងឱ្យកម្ពុជា កញ្ញា ហង្ស ម៉ានីតា បានបង្ហាញសមត្ថភាពដើរយ៉ាងស្វាហាប់ និង ជឿជាក់ ពោរពេញដោយទំនុកចិត្តបំផុតទាំងការបង្ហាញខ្លួនក្នុងឈុតរាត្រីសមោសរ និង ឈុតប៊ីគីនី ជាពិសេសឈុតតំណាងជាតិខ្មែរយ៉ាងអស្ចារ្យ ដោយបានធ្វើឱ្យមហាជនបានទស្សនាហើយមានមោទកភាពចំពោះនាងយ៉ាងខ្លាំង។
អ្វីដែលកាន់តែពិសេស ក្នុងការប្រកួតវគ្គបឋម MU 2022 កញ្ញា ហង្ស ម៉ានីតា ក៏មានអ្នកគាំទ្រនៅឯសហរដ្ឋអាមេរិកបានទៅទស្សនាផ្ទាល់ដើម្បីលើកទឹកចិត្តនាងថែមទៀតផង។ លើសពីនោះ ក៏មាន MUC ៤ ជំនាន់ ព្រមទាំងតារាចម្រៀង ចំរើន សុភា ក៏បានទៅចូលរួមផ្តល់កម្លាំងចិត្តដល់បវរកញ្ញាកម្ពុជាដោយផ្ទាល់ដូចគ្នាដែរ។
ជាមួយគ្នានោះ ក្រឡេកមកមើលអ្នកគាំទ្រក្នុងស្រុក ពោលគឺនៅប្រទេសកម្ពុជាដែលបានទស្សនាការផ្សាយបន្តផ្ទាល់ពីបណ្តាញសង្គមវិញក៏មិនចាញ់គ្នាដែរ ពួកគេបានបង្ហាញសកម្មភាពគាំទ្រយ៉ាងខ្លាំង ខណៈ ហង្ស ម៉ានីតា ចេញបង្ហាញខ្លួនមួយវគ្គៗ មានការស្រែកហ៊ោកញ្ច្រៀវផង ដោយក្ដីស្រឡាញ់ និង មោទកភាពខ្លាំងចំពោះនាង។
ទន្ទឹមនឹងការប្រកួតវគ្គផ្តាច់ព្រ័ត្រនឹងមកដល់នៅយប់ថ្ងៃទី ១៤ ខែមករា ឆ្នាំ ២០២២ ពេលវេលានៅសហរដ្ឋអាមេរិក និង ត្រូវនឹងថ្ងៃទី ១៥ ខែមករា ឆ្នាំ ២០២២ ពេលវេលានៅកម្ពុជា ស្រាប់តែ លោក ម៉ែន និមលរ័ត្ន ប្រធានស្ថាប័ន MUC បានប្រកាសនឹងរៀបចំកន្លែងទស្សនា ២ កន្លែង នៅរាជធានីភ្នំពេញឱ្យអ្នកគាំទ្រអាចចូលរួមដោយសេរីដើម្បីទស្សនាការផ្សាយបន្តផ្ទាល់ គាំទ្រដល់កញ្ញា ហង្ស ម៉ានីតា។
លោក ម៉ែន និមលរ័ត្ន បានរៀបរាប់ថា៖ «កុំភ្លេចយកកញ្ចែរ ត្រែ ស្គរ គម្របឆ្នាំង ខ្ទះ វែក តែសុំថ្មីៗ ស្អាតៗ មកទូងគាំទ្រផង! មកចូលរួមជួបជុំគ្នាគាំទ្រ Manita ទស្សនាការ Live ផ្ទាល់នៅថ្ងៃផ្តាច់ព្រ័ត្រដោយផ្ទាល់ទេ? បើយើងខ្ញុំរៀបចំទីតាំងសំខាន់ៗ ឱ្យដល់ទៅពីរកន្លែងធំៗផ្សេងគ្នានៅកណ្តាលក្រុងភ្នំពេញ??? ទីតាំងទី ១ ទទួលបាន ១៥០ នាក់ អាចទិញអាហារញាំបានឆ្ងាញ់ៗ។ ទីតាំងទី ២ ទទួលបាន ២០០ នាក់ មានអាំងប៉ាវឱ្យម្នាក់មួយ free។ ចូលរួមមិនគិតលុយ តែសូមកក់ឈ្មោះឥលូវនេះ ព្រោះកន្លែងមានកំណត់! ស្អែកនឹងជម្រាបទីតាំងពិតប្រាកដ។ សូមទទួលចុះឈ្មោះឥលូវនេះ!!!»៕
