ផ្អើលអ្នកគាំទ្រ! តួពេទ្យស្រីម្នាក់ក្នុងរឿង «ម្ចាស់ព្រះអាទិត្យ» ដួលសន្លប់បាត់មាត់-កនៅស្ថានីយរថភ្លើង
កាលពីថ្ងៃទី ១៤ ខែកញ្ញា ឆ្នាំ ២០២៤ កន្លងទៅ Wikitree បានចេញផ្សាយថាតារាសម្ដែង Park Hwan Hee បានដួលសន្លប់ធ្លាក់ពីលើជណ្ដើរភ្លាមៗខណៈកំពុងតែធ្វើដំណើរនៅស្ថានីយរថភ្លើង Gangnam ប្រទេសកូរ៉េខាងត្បូង។ តាមការចេញផ្សាយពីសារព័ត៌មានក្នុងស្រុកមួយបានលើកឡើងថា មនមនុស្សឃើញតារាស្រី Park Hwan Hee សន្លប់បាត់មាត់បាត់-កហើយក៏ត្រូវបានបុគ្គលិកនៅស្ថានីយនាំគ្នាធ្វើការសង្គ្រោះបឋមលើរូបនាងភ្លាមៗមុនបញ្ជូនបន្តទៅកាន់មន្ទីរពេទ្យ។
ដំណឹងមួយនេះដែរបានធ្វើឱ្យមហាជនក៏ដូចជាអ្នកគាំទ្រនាងជាច្រើនបង្ហាញក្ដីបារម្ភខ្លាំង និង បាននាំគ្នាចូលទៅខមមិនក្នុងផេកផ្ទាល់ខ្លួនរបស់នាងជូនពរឱ្យនាងឆាប់ជាសះស្បើយទៀតផង។ គួរឱ្យដឹងថាក្រោយហេតុការណ៍មិនយូរប៉ុន្មាន តារាសម្ដែងស្រីកើតឆ្នាំ ១៩៩០ រូបនេះក៏បានចេញមុខមកបញ្ជាក់ពីស្ថានភាពសុខភាពរបស់ខ្លួនដើម្បីកុំឱ្យអ្នកគាំទ្រនៅតែបារម្ភខ្លាំង។ នាងបានរៀបរាប់ថា ពេលនោះនាងមិនដឹងថាមានរឿងអ្វីខ្លះកើតលើរូបនាងនោះឡើយ ដឹងត្រឹមតែថាមុនពេលដួលសន្លប់នាងចាប់ផ្ដើមវិលមុខ និង ឈីពោះខ្លាំងភ្លាមៗ ហើយក៏ដួលធ្លាក់ពីលើជណ្ដើរទៅ។
Park Hwan Hee បានបន្ថែមទៀតថា សុខភាពនាងបច្ចុប្បន្នគឺធម្មតាវិញហើយ នាងអាចញ៉ាំ និង ធ្វើសកម្មភាពបានវិញដោយធម្មតា ហើយចំពោះរបួសវិញក្រោយធ្លាក់ពីជណ្ដើរនាងបានរងរបួសស្រាលតិចតួចប៉ុណ្ណោះ។ បន្ថែមពីនេះ តារាស្រីរូបនេះក៏បានសម្ដែងការដឹងគុណជាខ្លាំងចំពោះពលរដ្ឋ ២ នាក់ រួមទាំងបុគ្គលិកនៅស្ថានីយ Gangnam ដែលបានជួយសង្គ្រោះនាង និង ថែមទាំងគិតគូរបានដិតដល់ចំពោះរូបនាងថែមទៀត។ ពួកគេបានបិទបាំងមុខរបស់នាងពេលធ្វើការសង្គ្រោះបឋមដើម្បីធានាមិនមានការថតរូបរបស់នាងក្នុងស្ថានភាពអាក្រក់នេះចែមចាយលើបណ្ដាញសង្គម នាងពិតជាអរគុណពួកគេខ្លាំងមែនទែន។
គួររំឭកថា តារាសម្ដែងស្រី Park Hwan Hee ផ្ទុះប្រជាប្រិយភាពខ្លាំងក្រោយរូបនាងសម្ដែងជាតួអង្គគ្រូពេទ្យស្រីឈ្មោះ Choi Min Ji ក្នុងរឿង «Descendants of the Sun» ឬភាសាខ្មែរថា «ម្ចាស់ព្រះអាទិត្យ»។ ក្រោយទទួលបានភាពល្បីល្បាញ Park Hwan Hee ក៏បានមានវត្តមានក្នុងភាពយន្តជាច្រើនផ្សេងទៀតផងដែររួមមានរឿង «School 2015» «Jirisan» និង «The King In Love» ជាដើម៕
ប្រភព៖ Kenh14
