អ្នកកើតឆ្នាំខាលក្នុងឆ្នាំថ្មីនេះ មនុស្សប្រុសទំនាយបានលាភ តែមនុស្សស្រីទំនាយជួបគ្រោះកាចណាស់

តាមសៀវភៅ​មហាសង្ក្រាន្ត ដែល​រៀបរៀង​ដោយ​ឯកឧត្ដម អ៊ឹម បុរិន្ទ​ អគ្គលេខាធិការ​រង គណៈកម្មការ​ជាតិ​រៀបចំ​បុណ្យ​ជាតិ និង ​អន្តរជាតិ គណៈកម្មការ​ស្រាវជ្រាវ​វិជ្ជា​ហោរាសាស្ត្រ និង ​ប្រពៃណី​ទំនៀម​ទម្លាប់​ខ្មែរ បាន​បង្ហាញ​អំពី​ ជោគជតារាសីប្រចាំ ឆ្នាំឆ្លូវ សម្រាប់លោកអ្នកកើតឆ្នាំខាល ដូចខាងក្រោម ៖

បើជាមនុស្សប្រុស ឆ្នាំខាល ទំនាយថា ៖

ក្នុងឆ្នាំនេះ ជាឆ្នាំល្អប្រសើរណាស់ នឹងបានលាភធំ តែមុននឹងកើតលាភផល ត្រូវបាត់បង់ទ្រព្យរបស់ជាមុនសិន ហេតុដូចនេះត្រូវប្រុងប្រយ័ត្នខ្លួនបន្តិច ព្រោះត្រូវចោរកម្មវាបំណងទុក បន្ទាប់ពីនោះទៅ អ្នកត្រូវបានទទួលមុខតំណែងនាទីថ្មី មាននាទីទទួលខុសត្រូវជាន់ខ្ពស់ ឯជោគលាភដែលអ្នកត្រូវបាននោះ នឹងបានមកពីទីឆ្ងាយ តែត្រូវខំរក្សាកាយឱ្យល្អ ក្រែងមានជំងឺ តម្កាត់ផ្សេងៗ ។

បើជាមនុស្សស្រី ឆ្នាំខាល ទំនាយថា ៖

ក្នុងឆ្នាំនេះ អ្នកត្រូវតែកែកុន ប្រើសេចក្តីពិនិត្យពិច្ឆ័យឱ្យល្អិតល្អន់បន្តិច សូម្បីតែអ្នកដែលធ្លាប់រាប់រកអ្នកយ៉ាងណា ឬ អ្នកធ្វើការងាររួមនឹងគេ អ្នកកុំសង្ឃឹមឡើយថានឹងបានកម្រៃផលពីវង់ការបែបនោះឲ្យសោះ ពុំនោះនឹងបណ្ដាលហេតុ ពីក្នុងក្រុមគ្រួសារ មានភ័យព្រួយឈឺថ្កាត់ ឬ មានរឿងទំនាស់ ពីមនុស្សបម្រើការក្នុងលំនៅដ្ឋាន ។

ជតារាសីអ្នកក្នុងឆ្នាំនេះពុំប្រសើរទេ ជាគ្រោះកម្មកាចសាហាវណាស់ ការងារប្រចាំជីវិតរបស់អ្នក ឬ សេចក្តីស្និទ្ធស្នាលរបស់លោកអ្នកនឹងផ្តល់ផលជាអសារឥតការដល់អ្នកវិញ បើអ្នកចង់បន្ធូរបន្ថយការអាប់បែបនេះ អ្នកត្រូវខ្នះខ្នែងដោយប្រើសេចក្តីឆ្លៀវឆ្លាត និង សេចក្តីអង់អាចឱ្យគ្រប់កម្លាំង ទើបអ្នកបានប្រាសចាកវិបត្តិទាំងនេះទៅខ្លះ ៕