នេះជាទឹកចិត្ត! មុនឈ្នះពានយប់មិញ Yuu Hai បង្ហោះសារយ៉ាងមានអត្ថន័យមួយចំពោះគ្រូបង្វឹក និង អ្នកគាំទ្រ

កម្មវិធី The Rapper Cambodia រដូវកាលទី ១ បានរកឃើញម្ចាស់ពានហើយ គឺបានទៅលើ Yuu Hai ជាកូនក្រុមរបស់ Coach Norith ជាមួយការអបអរសាទរជាច្រើនពីសំណាក់មហាជន ចំពោះអនាគត Rapper ដំបូងរបស់ប្រទេសកម្ពុជារូបនេះ។

យ៉ាងណាមិញមុនឈ្នះពានយប់មិញនេះ ម្ចាស់ពានរូបនេះក៏បានបង្ហោះសារលើគណនីហ្វេសប៊ុករបស់ខ្លួន ដោយរៀបរាប់ថា ៖ «ខ្ញុំមិនអាចមកដល់ចំណុចនេះដោយគ្មានការគាំទ្ររបស់អ្នកទាំងអស់គ្នាទេ អរគុណយ៉ាងខ្លាំងទៅដល់អ្នកដែលបានស្រឡាញ់គាំទ្រ បោះឆ្នោតឱ្យខ្ញុំកន្លងមក និង រាល់ការ comment ឬ video ព្រមទាំងពាក្យលើកទឹកចិត្តរបស់អ្នកទាំងអស់គ្នាគឺជាអ្វីដែលជំរុញឲ្យខ្ញុំមានកម្លាំងចិត្តបន្តទៅមុខ»។

Yuu Hai ក៏បានបន្តនិយាយទៀតថា ៖ «ជាចុងក្រោយខ្ញុំសូមអរគុណដល់ Coach Norith ដែលបានបង្ហាត់បង្រៀន និង ផ្តល់បទពិសោធជាច្រើនមកដល់ខ្ញុំក្នុងរយៈពេលដ៏ខ្លីនេះ និង ពីគ្រូបង្វឹកម្នាក់ក្លាយទៅជាមនុស្សម្នាក់ដែលខ្ញុំមានការកោតសរសើរ និង សម្លឹងឃើញ ដូចនេះខ្ញុំសូមអរគុណដល់អ្នកម្ដងទៀត បើសិនជាគ្មានអ្នកទេក៏មិនមាន Yuu Hai ដែរ»៕