ទីបំផុត! Patricia និង ស្វាមី បានទម្លាយពីភេទរបស់ទាយាទស្នងមរតកហើយ នៅមិនយូរខែទេ
ដូចដែលប្រិយមិត្តអ្នកតាមដានបានដឹងមកហើយ កាលពីចុងឆ្នាំ ២០២២ តារាសម្ដែងស្រី Patricia បានរៀបការជាមួយនឹងហាយសូរលុយវាល់លានលោក Note Vises ហើយដំណឹងល្អមួយនេះ បានធ្វើឱ្យក្រុមអ្នកគាំទ្ររបស់នាងរំភើបយ៉ាងខ្លាំង។
ទោះជាយ៉ាងណា ក្រោយពីគូស្នេហ៍មួយគូនេះ រៀបការបានជាង ២ ខែ ស្រាប់តែអ្នកទាំងពីរបានប្រកាសដំណឹងល្អមួយទៀតនោះគឺ ពួកគេកំពុងទទួលបានកូនដំបូងចូលមកក្នុងគ្រួសារ។ ក្នុងនោះដែរ ក្រោយពីបានដឹងថា តារាស្រី Patricia បានពពោះកូនដំបូង បណ្តាក្រុមអ្នកគាំទ្រពិតជាចង់ដឹងថា តើភេទរបស់ទាយាទស្នងមរកតរបស់ត្រកូល Rangsisingpipat គឺកូនប្រុស ឬ កូនស្រី។
យ៉ាងណាមិញ កាលពីពេលថ្មីៗនេះ ប្តី-ប្រពន្ធមួយគូនេះបានរៀបចំពិធីជប់លៀងតូចមួយ ហើយបានចម្លើយសំណួរអំពីភេទរបស់កូនក្នុងផ្ទៃពោះរបស់ Patricia ដែលពេលនេះ កូនក្នុងផ្ទៃរបស់នាងគឺបាន ៤ ខែមកហើយ។ ជាមួយគ្នានោះ នាង និងស្វាមី បានកាត់នំខេក ជាការបង្ហាញពីចម្លើយប្រាប់ទៅកាន់អ្នករាល់គ្នាឱ្យបានដឹងថា កូនក្នុងផ្ទៃដំបូងរបស់ Patricia គឺជា «កូនស្រី» ព្រោះសាច់នំខាងក្នុងមានពណ៌ផ្កាឈូកជាពណ៌តំណាងឱ្យភេទស្រី។
ឃើញដូចនេះ ក៏មានមតិសាទរយ៉ាងច្រើនដល់អ្នកទាំងពីរ ព្រោះនៅមិនយូរខែទៀតនោះទេនឹងបានឃើញមុខរបស់នាងតូចហើយ៕
