ទឹកជំនន់នៅនីហ្សេរីយ៉ា បានធ្វើឱ្យមនុស្សប្រមាណជាង ៦០០ នាក់បា.ត់ប.-ង់ជីវិត
រដ្ឋមន្ត្រីគ្រប់គ្រងគ្រោះមហន្តរាយនីហ្សេរីយ៉ាបាននិយាយថា ទឹកជំនន់នាពេលថ្មីៗនេះបានក្លាយជាគ្រោះមហន្តរាយដ៏ធ្ងន់ធ្ងរមួយ។ មនុស្សជាង ៦០០ នាក់បានស្លាប់នៅក្នុងទឹកជំនន់ដ៏អាក្រក់បំផុតដែលប្រទេសអាហ្វ្រិកខាងលិចមិនធ្លាប់បានឃើញក្នុងរយៈពេលមួយទសវត្សរ៍មកនេះ។ មិនតែប៉ុណ្ណោះ មានមនុស្សប្រហែល ១.៣ លាននាក់ត្រូវបានផ្លាស់ទីលំនៅ ហើយផ្ទះជាង ២០០០០០ ខ្នងត្រូវបានបំផ្លាញ។
ទឹកជំនន់នេះត្រូវបានគេរំពឹងថានឹងបន្តរហូតដល់ចុងខែ វិច្ឆិកា។ ជាធម្មតា នីហ្សេរីយ៉ាធ្លាប់មានទឹកជំនន់តាមរដូវ ប៉ុន្តែឆ្នាំនេះមានសភាពធ្ងន់ធ្ងរជាងធម្មតា។ រដ្ឋាភិបាលបាននិយាយថា ភ្លៀងធ្លាក់ខ្លាំងខុសពីធម្មតា ហើយចាប់តាំងពីទឹកជំនន់បានចាប់ផ្តើមនៅដើមរដូវក្តៅមក ដីស្រែចំការជាច្រើនត្រូវបានបំផ្លាញ ខណៈដែលមានការព្រួយបារម្ភអំពីការរីករាលដាលនៃជំងឺ ហើយការផ្គត់ផ្គង់អាហារ និង ប្រេងឥន្ធនៈក៏មានផលប៉ះពាល់ផងដែរ។
នៅក្នុងសន្និសីទសារព័ត៌មានមួយកាលពីថ្ងៃអាទិត្យ ទី ១៦ ខែតុលា ឆ្នាំ ២០២២ កន្លងទៅរដ្ឋមន្ត្រីកិច្ចការមនុស្សធម៌ និងការគ្រប់គ្រងគ្រោះមហន្តរាយរបស់ប្រទេសនីហ្សេរីយ៉ា លោកស្រី Sadiya Umar Farouk បានអំពាវនាវដល់អាជ្ញាធរក្នុងតំបន់ឱ្យជម្លៀសប្រជាជនដែលរស់នៅក្នុងតំបន់ដែលមានហានិភ័យខ្ពស់បំផុត។ លោកស្រីបានបន្តថា អាជ្ញាធរកំពុងផ្តល់ស្បៀងអាហារ និង ការឧបត្ថម្ភផ្សេងៗដល់អ្នករងគ្រោះរួចហើយ។
គួរដឹងដែរថា គ្រោះមហន្តរាយនេះបានប៉ះពាល់ដល់រដ្ឋចំនួន ២៧ ក្នុងចំណោមរដ្ឋចំនួន ៣៦ របស់ប្រទេសនីហ្សេរីយ៉ា ហើយមនុស្សជាច្រើនមិនមានមធ្យោបាយផ្លាស់ប្តូរទីលំនៅទេ។ កម្មវិធីស្បៀងអាហារពិភពលោក និង អង្គការស្បៀងអាហារ និង កសិកម្មរបស់អង្គការសហប្រជាជាតិបាននិយាយកាលពីខែមុនថានីហ្សេរីយ៉ាស្ថិតក្នុងចំណោមប្រទេសចំនួនប្រាំមួយដែលកំពុងប្រឈមនឹងហានិភ័យខ្ពស់នៃកម្រិតគ្រោះមហន្តរាយនៃភាពអត់ឃ្លាន។ ដោយឡែក ទីភ្នាក់ងារឧតុនិយមរបស់ប្រទេសនីហ្សេរីយ៉ាបានព្រមានថា ទឹកជំនន់អាចបន្តរហូតដល់ចុងខែវិច្ឆិកា នៅក្នុងរដ្ឋមួយចំនួននៅភាគខាងត្បូងនៃប្រទេស រួមទាំង Anambra, តំបន់ដីសណ្ត, ទន្លេ និង Bayelsa ៕
ប្រភព៖ BBC
