រកផ្លូវវៀងទៅ! ក្រសួងប្រកាសផ្អាកការធ្វើដំណើរបណ្តោះអាសន្ន ផ្លូវជាតិលេខ ៥០C ទៅខេត្តកំពង់ធំ

ឥឡូវនេះ កំណាត់ផ្លូវជាតិលេខ ៥០ C ចាប់ពីចំណុចភូមិកង្កែប​ ឃុំច្រណូក​ ស្រុកកំពង់លែង​ ខេត្តកំពង់ឆ្នាំង ទៅកាន់ក្រុងស្ទឹងសែន ខេត្តកំពង់ធំ ត្រូវបានកាត់ផ្តាច់ដោយទឹកជំនន់ទន្លេមេគង្គ ដែលមិនអាចឱ្យប្រជាពលរដ្ឋធ្វើដំណើរឆ្លងកាត់ទៅមកបានឡើយ ។ ដូច្នេះបើបងប្អូន ដែលត្រូវធ្វើដំណើរឆ្លងកាត់តាមផ្លូវជាតិលេខ ៥០Cនេះ គួរតែវៀងទៅផ្លូវផ្សេងវិញ ។

បើយោងតាមសេចក្តីជូនដំណឹងរបស់ក្រសួងសាធារណៈការ និង ដឹកជញ្ជូន បានឱ្យដឹងថា ដោយពិនិត្យឃើញថាកម្ពស់ទឹកទន្លេ​ បាន និង កំពុងកើតឡើងជាបន្ទបន្ទាប់ពីមួយថ្ងៃទៅមួយថ្ងៃបានធ្វើឱ្យកំណាត់ផ្លូវជាតិលេខ​ ៥០C ចាប់ពីចំណុចផ្លូវកែង​ ភូមិកង្កែប​ ឃុំច្រណូក​ ស្រុកកំពង់លែងខេត្តកំពង់ឆ្នាំង​ រហូតដល់ចំណុចព្រំប្រទល់ខេត្តកំពង់ធំ​ ចាប់ផ្ដើមលិច​ និង ហូរកាត់ផ្លូវដោយកន្លែងៗ​ ដែលអាចបង្កឱ្យមានការខូចខាត​ ដោយអន្លើ​ និង ងាយទទួលរងការខូចខាតខ្លាំងក្នុងពេលដែលយានយន្តគ្រប់ប្រភេទនៅតែបន្តការធ្វើចរាចរណ៍ឆ្លងកាត់​ ។

នៅក្នុងសេចក្តីជូនដំណឹងនោះ ក៏បានបញ្ជាក់ថា ដើម្បីការពារសុវត្ថិភាពដល់ការធ្វើដំណើរ​ និងបញ្ជៀសគ្រោះថ្នាក់ ដែលកើតឡើងជាយថាហេតុ​នោះ ក្រសួងសូមធ្វើការផ្អាក ការធ្វើចរាចរណ៍លើកំណាត់ផ្លូវជាតិលេខ​ ៥០C ជាបណ្ដោះអាសន្ន ចាប់ពីចំណុចផ្លូវកែងកង្កែប​ ឃុំច្រណូក​ ស្រុកកំពង់លែង រហូតដល់ចំណុចព្រំប្រទល់ខេត្តកំពង់ធំ​ ចាប់ពីថ្ងៃជូនដំណឹងនេះរហូតដល់រដូវទឹកស្រក់​ និង មានការជូនដំណឹងជាថ្មី​ ៕