រឿងបែបនេះ! ទើបការស្លាប់របស់តារាចម្រៀង «វេហា» ធ្វើឱ្យសិល្បករជាច្រើនសោកស្តាយយ៉ាងខ្លាំង

កាលពីថ្ងៃចុងសប្តាហ៍ម្សិលមិញនេះ នៅក្នុងបណ្តាញសង្គមមានការចែករំលែកនូវភាពសោកស្តាយយ៉ាងខ្លាំង បន្ទាប់ពីការបាត់បង់ជីវិតរបស់តារាចម្រៀងឈ្មោះ ហា៊ង វេងហេង ដែលគេបានស្គាល់នៅក្នុងវិស័យសិល្បៈឈ្មោះ «វេហា» ដោយគ្រោះថ្នាក់ចរាចរណ៍នៅយប់ទៀបភ្លឺម៉ោង ៤ និង ៣៥ នាទី ថ្ងៃទី ១២ កក្កដា ។

សិល្បករជាច្រើនបានចូលរួមរំលែកទុក្ខនៃការបាត់បង់ជីវិតរបស់តារាចម្រៀងវ័យ ២៧ ឆ្នាំរូបនេះ ក៏ដូចជាបានរៀបរាប់នូវអំពើល្អ និង រឿងរ៉ាវរបស់ «វេហា» កាលនៅមានជីវិត «គឺជាបុគ្គលម្នាក់ហេតុតែស្រឡាញ់សិល្បៈ ស៊ូជំនះគ្រប់រឿងរ៉ាវរហូតបានក្លាយជាអ្នកចម្រៀង និង បានច្រៀងក្នុងហាងនាពេលរាត្រី ហើយពេលខ្លះឆ្លៀតលក់ទាខ្វៃទឹកឃ្មុំនៅស្តុបផ្សារដីហុយដើម្បីបានប្រាក់កម្រៃខ្លះៗដើម្បីជួយកាត់បន្ថយការចំណាយរបស់ឪពុក ។ មិនត្រឹមតែប៉ុណ្ណោះ តារាចម្រៀងរូបនេះក៏មានចំណេះដឹងខ្ពស់ផងដែរ គឺលោកគឺជានិស្សិតពេទធ្មេញឆ្នាំទី ៧» ។

គួរំឭកដែរថា ក្រោយពីបានចាកចេញពីស្រុកកំណើតដើម្បីបន្តការសិក្សាតាំងពីឆ្នាំ ២០១២ ហេតុតែស្រឡាញ់សិល្បៈខ្លាំង តារាចម្រៀងរូបនេះធ្លាប់បានចូលប្រកួតការប្រឡងចម្រៀងជាច្រើន ហើយកម្មវិធីចុងក្រោយដែលធ្វើឲ្យមហាជនបានស្គាល់រូបលោកនោះ គឺនៅពេលដែលលោកបានឈានជើងចូលប្រឡងកម្មវិធី Cambodia Idol ៕