រយៈពេល ៤ ខែ កសិករ សំអាត សម អាចរកចំណូលបាន ៣ ៦០០ ០០០រៀល ពីរបរចិញ្ចឹមកង្កែប

ដើម្បីបំពេញតម្រូវការទីផ្សារនាពេលបច្ចុប្បន្ននេះ មានប្រជាកសិករជាច្រើន នៅក្នុងប្រទេសកម្ពុជាបានងាកមកប្រកបរបរចិញ្ចឹមកង្កែបជាច្រើនគ្រួសារដើម្បីរកចំណូលជួយផ្គត់ផ្គង់ជីវភាពគ្រួសារ និង​ ចូលរួមកាត់បន្ថយការនាំចូលកង្កែបពីប្រទេសជិតខាង ។

ជាក់ស្តែងកសិករ សំអាត សម រស់នៅក្នុងភូមិអូរស្រងាំ ឃុំដូនសរ ស្រុកស្វាយជ្រុំ ខេត្តស្វាយរៀង បានប្រកបរបរចិញ្ចឹមកង្កែបក្នុងអាងចំនួន ១០ អាង ដោយមានមេពូជចំនួន ២០០ ក្បាល ក្នុងរយៈពេល ៤ ខែកន្លងមកនេះ គាត់ចិញ្ចឹម និង លក់កូនកង្កែបបានចំនួន ៩០ ០០០ ក្បាល ក្នុងតម្លៃ ៤០០ រៀលក្នុង១ក្បាល ដែលទទួលបានប្រាក់ចំណូលសរុបចំនួន ៣ ៦០០ ០០០ រៀល ។ បច្ចុប្បន្ននេះ គាត់កំពុងបំប៉នកូនកង្កែបលក់ចំនួន ៣០ ០០០ ក្បាលបន្ថែមទៀត ។

លោក សំអាត សម បានឱ្យដឹងទៀតថា ការចិញ្ចឹមកង្កែបក្នុងអាងនេះ វាមិនមានអ្វីលំបាកឡើយ ប៉ុន្តែត្រូវឱ្យយើងឧស្សហ៍ព្យាយាម ទើបទទួលបានជោគជ័យ ។ កន្លងមកគាត់ក៏បានទទួលការបង្ហាត់បង្រៀនពីមន្ត្រីនៃមន្ទីរកសិកម្មខេត្តផងដែរ ទើបការចិញ្ចឹមកង្កែបរបស់គាតទទួលបានជោគជ័យបែបនេះ ៕

 

ប្រភពៈមន្ទីរកសិកម្ម ខេត្តស្វាយរៀង