មើលសម្រស់ នី មុន្នីនាថ ក្នុងតួយាយវរនាថខ្មែរ កាចឆ្នាសឆ្នើម គួរឱ្យខ្លាច

ប្រិយមិត្តបានដឹងរួចមកហើយពីរឿងភាគបែបមានមន្តអាគមអសុរកាយក្អែប «ទាយាទអសុរកាយ» ជារឿងភាគថៃដ៏ល្បីមួយ ដោយមកដល់ពេលនេះត្រូវបានគេផលិតឡើងវិញ ៣ ជំនាន់មកហើយ ដែលតារាស្រីសម្តែងជាតួយាយវរនាថមានអ្នកស្រី អ្នកស្រី Chamaiporn Jaturaput ជំនាន់ទី ១ អ្នកស្រី Nok Sinjai ជំនាន់ទី ២ និង នាង Benz Pornchita ជំនាន់ទី ៣ ។

ជាមួយខ្សែរឿងភាគដ៏ល្បីល្បាញនេះដែរ ត្រូវបានស្ថានីយទូរទស្សន៍ប៉ុស្តិ៍ ៥ ទិញសិទ្ធិមកផលិតសាឡើងវិញផងដែរ កាលពីដើមខែមករា ឆ្នាំ ២០១៨ កន្លងទៅ ដោយដាក់ចំណងជើង «ទាយាទអសុរ» ក្នុងនោះដែរតារាសម្តែងទឹកភ្នែក នី មុន្នីនាថ បានគ្រងតំណែងជាតួអង្គយាយវរនាថ និង មានឈ្មោះក្នុងរឿងគឺ យាយមន្តថាវី ។

ក្នុងការសម្តែងរឿងនោះ តារាស្រី នី មុន្នីនាថ បានបញ្ចេញទេពកោសល្យមួយបែបទៀតជាតួអង្គកាច និង គួរឱ្យខ្លាច ខុសពីងារដែលអ្នកគាំទ្របានដាក់ថាជាតារាទឹកភ្នែក ដោយនាងសម្តែងបានយ៉ាងស័ក្តិសមឥតខ្ចោះក្នុងតួអង្គយាយវរនាថ រហូតមានការលើកសរសើរពីទស្សនិកជនថា យាយវរនាថខ្មែរ និង យាយវរនាថថៃ គួរឱ្យខ្លាចម្យ៉ាងម្នាក់ ។

ងាកចេញពីរឿងខាងលើនោះ បើក្រឡែកមកមើលសម្រស់ នី មុន្នីនាថ តួអង្គយាយវរនាថនាពេលបច្ចុប្បន្នវិញ គេកត់សម្គាល់ឃើញកាន់តែមានភាពស្រស់ស្អាតខ្លាំងឡើង មិនថាមើលពីជ្រុងខាងណានោះឡើយ ជាពិសេសនៅពេលដែលតារាស្រីរូបនេះរកឃើញអ្នកស្អំបេះដូងថ្មីជាអ្នកជំនួញរស់នៅប្រទេសអូស្ត្រាលី បន្ទាប់ពីបែកបាក់ពូគូស្នេហ៍ចាស់លោក សូឡាំង នោះ ៕