ភ្ជាប់ពាក្យ ៦ ឆ្នាំ ចំរើន សុភ័ក្ត្រ មិនទាន់ដាច់ចិត្តរៀបការ មកពីហេតុផលនេះ!

ថ្វីដ្បិតភ្ជាប់ពាក្យច្រើនឆ្នាំក៏ពិតមែន ចំរើន សុភ័ក្ត្រ នៅតែមិនទាន់មានបំណងចង់រៀបការទៅតាមប្រពៃណីខ្មែរនៅឡើយទេ ដោយនាងអះអាងថាមិនទាន់មានគ្រឹះរឹងមាំនៅឡើយ ។

បើគិតមកដល់ពេលនេះ ចំរើន សុភ័ក្ត្រ ភ្ជាប់ពាក្យប្រមាណជា ៦ ឆ្នាំហើយ និង ជារឿយៗនាងតែងបណ្តើរគូស្នេហ៍ចូលរួមនៅក្នុងកម្មវិធីនានា រួមទាំងការដើរកម្សាន្តស្ទើរដូចប្តីប្រពន្ធផងដែរ ។ ក្នុងនោះក៏មានការលើកឡើងថា មូលហេតុអ្វី ចំរើន សុភ័ក្ត្រ មិនរៀបការ ឬខ្លាចប៉ះពាល់ការងារសិល្បៈ? តែយ៉ាងណាតារាចម្រៀងរូបរាងតូចល្អិតរូបនេះបង្ហើបថា នាងក៏មានគម្រោងរៀបការដែរ តែពេលនេះមិនទាន់មានប្រាក់គ្រប់គ្រាន់ ហេតុនេះហើយទើបនាងប្រឹងប្រែងរកចំណូលនានាតាមរយៈមុខជំនួញបន្ទាប់បន្សំក្រៅពីសិល្បៈ ។

មិនទាន់រៀបការក៏ពិតមែន តែចំណងស្នេហ៍របស់ ចំរើន សុភ័ក្ត្រ និង គូដណ្តឹងកាន់តែស៊ីជម្រៅ ល្អូកល្អើន ហើយជារឿយៗអ្នកទាំងពីរតែងបង្ហាញរូបភាពផ្អែមល្ហែមនៅតាមបណ្តាញសង្គម មើលទៅពិតជាគួរឱ្យច្រណែន ។ ក្នុងនោះក៏មានការសរសើរថាគូស្នេហ៍មួយគូនេះមើលទៅស័ក្តិសមគ្នាណាស់ទាំងរូបរាង និង វ័យប្រដំប្រសងគ្នា ៕