អ្នកគាំទ្រពេញចិត្តខ្លាំង ពេលឃើញ Aff រឹងមាំឡើងវិញ ហើយសម្ដែងសមយ៉ាងនេះ
កាលពីពេលថ្មីៗ កន្លងទៅនេះ Aff taksaorn មានវត្តមានជាពិធីការនីកម្មវិធីកម្សាន្តដ៏ល្បីមួយរបស់ថៃ ដោយក្នុងកម្មវិធីក៏មានការអញ្ជើញចូលរួមពីតារាសម្ដែងស្រីល្បីឈ្មោះ Bella ដើម្បីចូលខ្លួនមកសម្ភាស ។
ទន្ទឹមនឹងនេះដែរ កម្មវិធីក៏មានការបង្កើតនូវឈុតឆាករឿងខ្លី ដើម្បីសម្ដែងបង្កបរិយាកាសកម្មវិធីឱ្យកាន់តែសប្បាយរីករាយបន្ថែម ដោយមានវត្តមានតារាកិត្តិយស Bella ចូលរួមសម្ដែងជាមួយនឹងពីធីការនី Aff ព្រមទាំងពិធីការនីប្រចាំកម្មវិធីតែម្តង ។
ក្នុងនោះដែរ សម្រាប់ Aff មិនថាតួអង្គបែបណាឡើយ នាងអាចធ្វើបានទាំងអស់ ទាំងតួអង្គស្លូត ឬ កាច សុទ្ធតែធ្វើឱ្យមហាជនពេញចិត្ត និង កោតសរសើរនាងគ្រប់ៗគ្នា ។ អ្វីដែលរឹតតែធ្វើឱ្យអ្នកគាំទ្រពេញចិត្តខ្លាំងនោះគឺឈុតឆាកមួយដែល Aff សម្ដែងជាតួអង្គកាចឆ្នាសឆ្នើម វាយតប់ជាមួយពិធីការនីនៃកម្មវិធី ដែលការសម្ដែងកាចបែបនេះវាបានធ្វើឱ្យអ្នកទស្សនារំភើបក៏ដូចជាពេញចិត្តខ្លាំង ព្រោះដោយហេតុថាអ្នកគាំទ្រព្រួយបារម្ភពីសុខទុក្ខនាងខណៈដែលពួកគេបានដឹងរឿងរ៉ាវជីវិតពិតរបស់ Aff ហើយពួកគេចង់ឱ្យ Aff ជាមនុស្សដែលរឹងមាំបែបនេះក្នុងជីវិតពិត ពួកគេហាក់មិនចង់ឃើញនាងទន់ខ្សោយនោះឡើយ ស្របដែលលេចឮដំណឹងការរៀបការរបស់អតីតស្វាមីនាង គឺលោក Sangkran និង តារាសម្ដែងស្រី Matt ។
ថ្វីដ្បិតតែ Aff លែងមានទំនាក់ទំនងជាមួយអតីតសា្វមីនាងក៏ពិតមែន ក៏ប៉ុន្តែសម្រាប់អ្នកគាំទ្រនាងតែងតែបារម្ភអំពីនាងរហូត ។ ទន្ទឹមនឹងនេះដែរ ក្រោយពីកម្មវិធីចាក់ផ្សាយមក មហាជនជាច្រើនបានចូលបញ្ចេញមតិ រំភើបសប្បាយ ដែលឃើញ Aff ជាមនុស្សរឹងមាំបែបនេះ ៕
