បរាជ័យពី X-Factor Cambodia យុវតី ៣ រូបនេះចាប់ដៃបង្កើតក្រុម «Lady Smile» វាយលុកវិថីសិល្បៈ

បើរំឭកពីកម្មវិធីប្រកួតដ៏ធំ «X-Factor Cambodia» របស់ស្ថានីយ៍ទូរទស្សន៍ហង្សមាស មហាជនអ្នកបានទស្សនាប្រាកដជាបានឃើញបេក្ខភាពជាច្រើនដែលមានសម្ថភាពចូលរួមប្រកួតទាំងចម្រៀងទោល និង ក្រុមផងដែរ ។ ក្នុងនោះអ្នកទស្សនាច្បាស់ណាស់ប្រាកដជាបានស្គាល់បេក្ខនារីចំនួន ៣ រូប មានដូចជា កញ្ញា វឿន ជីវ៉ា កញ្ញា ហ្វារីដា និង កញ្ញា ឡៅ មុន្នីវណ្ណ ជាដើម ។

ទោះជាបេក្ខនារីទាំង ៣ រូប ខាងលើមិនអាចមានឱកាសឈានដល់វគ្គផ្តាច់ព្រ័ត្រក្នុងកម្មវិធីក៏ពិតមែន ប៉ុន្តែស្រីស្អាតមានសមត្ថភាពទាំងនោះ គឺទទួលបានការគាំទ្រ និង ក្លាយទៅជាតារាចម្រៀងអាជីពយ៉ាងមានប្រជាប្រិយភាពផងដែរនាពេលបច្ចុប្បន្ន ។ ក្នុងនោះ បេក្ខភាពទាំង ៣ រូប ខាងលើនេះក៏បានបង្កើតក្រុមចម្រៀងឈ្មោះ «Lady Smile» ដែលពេលនេះកំពុងតែប្រឡូកក្នុងវិថីសិល្បៈ ។

ទោះជាក្រុមចម្រៀង «Lady Smile» ទើបតែបានបង្កើតឡើងក៏ពិតមែន ប៉ុន្តែសន្ទុះនៃការគាំទ្រ និង ការបង្ហាញខ្លួនរបស់នារីទាំង ៣ រូប កាន់តែឃើញជារៀងរាល់សប្តាហ៍នៅក្នុងកម្មវិធីប្រគំតន្ត្រីនានា ។

គួរឲ្យដឹងថា «Lady Smile» ផ្តើមចេញពីបេក្ខនារីមិនទទួលបានជ័យលាភី «X-Factor» បានសម្រេចចាប់ដៃគ្នាជាក្រុមមួយនេះ ក៏ព្រោះតែក្តីស្រមៃ និង ការផ្តល់កម្លាំងចិត្តពីសំណាក់អ្នកគាំទ្រ ព្រមទាំងមិត្តភក្តិជុំវិញខ្លួន ។ នេះបើតាមការឲ្យដឹងពីលោក យ៉េប រ៉ូហ្វាត អ្នកគ្រប់គ្រងក្រុមចម្រៀង «Lady Smile» ៕