ស្ងាត់ៗលេចធ្លាយថា សុន ស្រីពេជ្រ ចេញពីថោន ហក់ចូលផលិតកម្មថ្មីមួយ

មួយរយៈចុងក្រោយនេះ គេចាប់អារម្មណ៍ឃើញតារាចម្រៀង សុន ស្រីពេជ្រ ហាក់មិនមានបទចម្រៀងថ្មីៗនៅក្នុងផលិតកម្មថោននោះទេ បើទោះមិត្តរួមផលិតកម្មចេញបទចម្រៀងថ្មីជាបន្តបន្ទាប់ក៏ដោយ ប៉ុន្តែពេលនេះមានការព្រលយថា សុន ស្រីពេជ្រ បានហក់ចូលក្នុងផលិតកម្មថ្មីសន្លាងមួយ ដែលកំពុងថតបទចម្រៀងបែបប្រពៃណីខ្មែរ ត្រៀមចេញនៅក្នុងពេលឆាប់ៗនេះ ។

ទោះបីជាមានការលើកឡើងបែបនេះក្តី តែគេពុំទាន់ដឹងថាជាការពិតឬបែបណាទេ ព្រោះមិនទាន់មានការបញ្ជាក់ពី សុន ស្រីពេជ្រ នៅឡើយ ។ គេចាំបានបានថា សុន ស្រីពេជ្រ បានចាកចេញពីផលិតកម្មខ្នាតយក្សហង្សមាសមកចូលក្នុងផលិតកម្មថោនប្រមាណជាពីរឆ្នាំហើយ តែប្រជាប្រិយភាពរបស់នាងហាក់មិនស្ទុះខ្លាំងនោះឡើយ ។ សុន ស្រីពេជ្រ ជាតារាចម្រៀងដែលមានទឹកដមសំឡេងពីរោះ ជាពិសេសស័ក្តិសមនឹងបទសម័យដើម និង បែបប្រពៃណីខ្មែរ ហើយនាងកាន់តែទទួលបានការគាំទ្រខ្លាំងពីសំណាក់មហាជន ក្រោយពីបានបង្ហើរសំនៀងយ៉ាងពីរោះក្នុងបទចម្រៀងដែលទាក់ទងទៅនឹងតំបន់ទេសចរណ៍ ។

ឈានចូលឆ្នាំថ្មី ២០២១ គេចាប់អារម្មណ៍ឃើញថា សុន ស្រីពេជ្រ មានការប្រែប្រួលខ្លាំង ពោលគឺរូបរាងរបស់នាងប្រែប្រួលជាស្រឡូនស្អាត ដែលនាងអះអាងថាស្រកពី ១៥ គីឡូ ពោលគឺពី ៦៨ គីឡូមកនៅត្រឹមតែ ៥៣ គីឡូប៉ុណ្ណោះ តែយ៉ាងមិនទាន់សមតាមបំណងទេនាងចង់បានគីឡូត្រឹមតែ ៤៨ ប៉ុណ្ណោះ ហើយក្នុងនោះក៏មានការសរសើរពីភាពស្រស់ស្អាតរបស់តារាចម្រៀងកូនពីររូបនេះនៅក្នុងឆ្នាំថ្មីនេះ ។ សុន ស្រីពេជ្រ ត្រូវបានគេចាត់ទុកជាតារាចម្រៀងដែលមានជីវិតស្នេហាមិនសមប្រកបរហូតដល់ទៅពីរលើក តែនាងនៅតែរឹងមាំ និង ពេលនេះកំពុងរស់នៅយ៉ាងមានក្តីសុខជាមួយនឹងកូនប្រុសស្រីទាំងពីរ ដោយមិនខ្វល់ពីងារជាមេម៉ាយនោះឡើយ ៕

រូបថត ៖ ហ្វេសប៊ុក