មូលហេតុនេះសោះ ទើបបាត់មុខអតីតហ្វ្រេសស៊ីរូបសង្ហា តុប វិសាល ក្រោយមានភរិយា!

អតីតហ្វ្រេសស៊ីប៊យលោក តុប វិសាល បានបាត់មុខពីការសម្តែងក្រោយពីលោកបានរៀបការមានភរិយារូបស្រស់ម្នាក់ រហូតមានការសង្ស័យថាតារាសម្តែងសាច់ដុំធំៗរូបនេះដកខ្លួនពីអាជីពសិល្បៈដោយសារភរិយាហាមឃាត់? ធ្វើឱ្យអ្នកគាំទ្រមិនតិចទេសោកស្តាយ ព្រោះលោកមានទាំងសម្រស់ និង សមត្ថភាព ។

គេចាំបានថាលោក តុប វិសាល បានលេចមុខនៅក្នុងការសម្តែងរឿងជាច្រើនដែលមានទាំងរឿងភាគ និង រឿងអប់រំ ហើយរឿងដែលល្បី និង ជាការសម្តែងចុងក្រោយរបស់លោកមានដូចជារឿង «បងប្អូន» «មុខកាំបិតមុខស្នេហ៍» និង រឿង «សន្យា» ជាដើម ។ បើតាមប្រភពដែលជិតដិតជាមួយតារាសម្តែង តុប វិសាល បានឱ្យដឹងថាមូលហេតុលោក តុប វិសាល ដកខ្លួនពីការងារសិល្បៈដោយសារក្រោយរៀបការរួចលោកបានចាកចេញទៅបន្តការសិក្សានៅប្រទេសជប៉ុនផ្នែកជំនួញ ដែលគិតមកដល់ពេលនេះប្រមាណជាងមួយឆ្នាំហើយ តែមិនច្បាស់ថាលោកនឹងបន្តការសិក្សានៅទីនោះរយៈពេលប៉ុន្មានឆ្នាំឡើយ ។ គ្រាន់តែដឹងថាតាមគម្រោងលោកនឹងត្រូវត្រលប់លេងស្រុកកំណើតនៅក្នុងឆ្នាំថ្មីនេះ តែដោយសារកូវីដ ១៩ មិនទាន់ស្ងប់ស្ងាត់ ទើបលោកខកខានក្នុងការចុះមកលេងក្រុមគ្រួសារ ។​

ដោយសាររូបរាងស្រស់សង្ហាបានធ្វើឱ្យតារាសម្តែង តុប វិសាល មានទីផ្សារការងារសិល្បៈរីកទូលាយជាខ្លាំង ដោយលោកលេចមុខនៅក្នុងការសម្តែងរឿង និង ស្ប៉តពាណិជ្ជកម្មជាច្រើន តែគួរឱ្យស្តាយលោកបានដកខ្លួនពីអាជីពសិល្បៈដោយមិនស្រណោះ ក្រោយពីបានរៀបការជាមួយនារីរូបស្រស់ម្នាក់ជាអ្នកខេត្តកំពង់ឆ្នាំងកាលពីខែមិថុនាឆ្នាំ ២០១៩ កន្លងទៅ ៕