ការពិតពិធីការិនីព័ត៌មានល្បីប៉ុស្តិ៍លេខ ៥ នេះ ជាម្តាយតារាចម្រៀង Ting Tong

បើនិយាយពីតារាចម្រៀង និង តារាសម្តែង លោក ឈិត សុវណ្ណនិមិត្ត ហៅ Ting Tong អ្នកគាំទ្រយុវវ័យជាច្រើនប្រាកដបានដឹងមកហើយពីទេពកោសល្យសិល្បៈរបស់តារាពហុជំនាញប្រុសរូបនេះ ។ ក្នុងនោះ Ting Tong មិនត្រឹមតែជាតារាចម្រៀង Original Song តែម្យ៉ាងនោះទេ តែលោកក៏មានជំនាញក្នុងការសម្តែង និង ច្រៀងបទប្រពៃណីភ្លេងការទៀតផង ។

យ៉ាងណាមិញ បើក្រឡេកទៅមើលជីវប្រវត្តិក្រុមគ្រួសាររបស់ Ting Tong ឯនោះវិញ គឺមិនមែនតែលោកម្នាក់ទេ ដែលជាសិល្បករពហុជំនាញនោះ គឺសូម្បីតែឪពុកម្តាយរបស់លោក ក៏ជាអ្នកចម្រៀងភ្លេងការដូចគ្នាដែរ ។ លើសពីនោះ បច្ចុប្បន្ន អ្នកម្តាយរបស់ Ting Tong ក៏ជាពិធីការិនីព័ត៌មានរៀមច្បងល្បីឈ្មោះប្រចាំទូរទស្សន៍ប៉ុស្តិ៍លេខ ៥ គឺលោកស្រី អោម សូដានី ។

លោកស្រី អោម សូដានី បានចាប់ផ្តើមចូលប្រឡូកលើវិថីសិល្បៈបុរាណខ្មែរតាមរយៈឪពុករបស់លោកស្រី ពោលគឺលោកតារបស់តារាម្រៀង Ting Tong ដែលជាអតីតសាស្ត្រាចារ្យផ្នែកតន្ត្រីបុរាណ ។ ក្រោយមកលោកស្រី អោម សូដានី ក៏បានរៀបការជាមួយលោក ឈិត សុវណ្ណ ជាអតីតសាស្រ្តាចារ្យនៅសកលវិទ្យាល័យមួយហើយបច្ចុប្បន្ន ស្វាមិរបស់លោកស្រីក៏ជាសិល្បករផ្នែកបុរាណផងដែរ ។ មកទល់ពេលនេះ លោកស្រី អោម សូដានី បានសាងកេរ្តិ៍ឈ្មោះជាពិធីការិនីដ៏ជំនាញ និង មានវិជ្ជាជីវៈលើកញ្ចក់ទូរទស្សន៍ប៉ុស្តិ៍លេខ ៥ តាំងពីប្រមាណជាង ២០ ឆ្នាំមុន រហូតមកដល់បច្ចុប្បន្ន។

អ្វីដែលកាន់តែគួរឲ្យសរសើរ និង ចាប់អារម្មណ៍ទៀតនោះពីគ្រួសាររបស់ពិធីការិនីព័ត៌មានរៀមច្បង លោកស្រី អោម សូដានី និង សិល្បៈករពហុជំនាញលោក លោក Ting Tong គឺជាក្រុមគ្រួសារសិល្បៈពហុជំនាញ ជាពិសេសគឺផ្នែកតន្ត្រីបុរាណតាំងពីជំនាន់ដូនតាមកម្ល៉េះ ។ ដូច្នេះហើយ ទើបធ្វើឲ្យ Ting Tong មានដុង និង ទេពកោសល្យផ្នែកសិល្បៈបុរាណតាមលោកតា និង ឪពុកម្តាយ ៕