ទោះមិនជាប់ពាន តែតារាចម្រៀងស្រី ៥ ដួងនេះ មានឈ្មោះល្បីមិនធម្មតាទេ

តារាចម្រៀងស្រករក្រោយជាច្រើនដួង បានផុសចេញតាមរយៈកម្មវិធីប្រឡងចម្រៀងលំដាប់ពិភពលោកដូចជា The Voice Cambodia ឬ Cambodian Idol ជាដើម ដែលរហូតមកដល់ពេលនេះ មានអតីតបេក្ខជនជាច្រើនបានក្លាយជាតារាចម្រៀងអាជីព និង កំពុងប្រកួតប្រជែងដណ្ដើមយកប្រជាប្រិយភាពពីសំណាក់អ្នកគាំទ្រ ។

យ៉ាងណាមិញ បើក្រឡេកទៅមើលពីតារាចម្រៀងស្រីវ័យក្មេង ៥ ដួងនេះវិញ ទោះបីជាពួកគេមិនបានក្លាយជាម្ចាស់ពានក៏ពិតមែន តែពួកគេសុទ្ធតែមានសមត្ថភាពខ្ពស់ អាចឆក់បានដួងចិត្តអ្នកគាំទ្រយ៉ាងច្រើនភ្លូកទឹកភ្លូកដី សាងកេរ្តិ៍ឈ្មោះល្បីមិនធម្មតាឡើយ ។

១. តន់ ចាន់សីម៉ា

អតីតបេក្ខភាពក្នុងកម្មវិធីប្រឡងចម្រៀង The Voice Cambodia រដូវកាលទី ២ តន់ ចាន់សីម៉ា បច្ចុប្បន្នបានក្លាយជាគ្រាប់ពេជ្រប្រចាំផលិតកម្ម Galaxy Navatra ជាមួយនឹងកេរ្ដិ៍ឈ្មោះល្បីល្បាញត្រឹមរយៈពេលដ៏ខ្លីស្ទើរមិនគួរឱ្យជឿ ដោយសារ​តែបទចម្រៀងរបស់នាងនីមួយៗ សុទ្ធសឹងតែមានការគាំទ្រខ្លាំងពីទស្សនិកជន ។

២. រ៉េត ស៊ូហ្សាណា

តារាចម្រៀងវ័យក្មេង រ៉េត ស៊ហ្សាណា ដែលមហាជនបានដឹងរួចហើយថា រូបនាងគឺជាអតីតបេក្ខភាពប្រឡងចម្រៀងក្នុងកម្មវិធី The Voice Cambodia រដូវកាលទី ២ បានក្លាយជាអ្នកចម្រៀងប្រចាំនៅផលិតកម្មរស្មីហង្សមាស ។ ជាមួយនឹងរូបសម្រស់ស្រស់ស្អាត ទេពកោសល្យដ៏សម្បូរបែប បានធ្វើឱ្យ ហ្សាណា ក្ដោបបានទីផ្សារពាណិជ្ជកម្មតូចធំជាច្រើន មិនតែប៉ុណ្ណោះ នាងក៏បានតំណែងជាតួឯកនៅក្នុងរឿងភាគទូរទស្សហង្សមាសទៀតផង ។

៣. សុវត្ថិឌី ធារិកា

ពេលរំឭកដល់ឈ្មោះ សុវត្ថិឌី ធារិកា ប្រិយមិត្តច្បាស់ជានឹកដល់សំឡេងដ៏ស្រួយស្រែស ដែលធ្លាប់ស្រែកច្រៀងនៅលើឆាក Cambodian Idol រដូវកាលទី ១ មិនខាន ។ បើទោះបីជានាងតូច មិនបានទទួលពានរង្វាន់ក៏ពិតមែន តែតារាចម្រៀងវ័យក្មេងរូបនេះ មានភាពលេចធ្លោមិនធម្មតាឡើយនៅក្នុងវិស័យសិល្បៈ ។

៤. ឈីន រតនៈ

តារាចម្រៀង ឈីន រតនៈ ជាអតីតបេក្ខភាពកម្មវិធីប្រឡងចម្រៀង The Voice Cambodia រដូវកាលទី ២ ។ ថ្វីដ្បិតតែតារាស្រីរូបនេះបរាជ័យនៅក្នុងកម្មវិធីក៏ពិតមែន តែមកទល់ពេលនេះ ឈីន រតនៈ ក៏បានជ្រកកោនក្នុងទ្រនំផលិតកម្ម រស្មីហង្សមាស ថែមទាំងកំពុងមានប្រជាប្រិយភាពខ្លាំងនាពេលបច្ចុប្បន្ន តាមរយៈទឹកដមសំឡេងដ៏ពីរោះក្រអួនក្រអៅរបស់នាង ។

៥. ប៉ាច គីមមួយ

ទោះមិនបានឈ្នះពាននៅក្នុងការប្រកួត The Voice Cambodia រដូវកាលទី ១ តែតារាចម្រៀង បាច គីមមួយ បានរក្សាជំហរយ៉ាងរឹងមាំក្នុងផលិតកម្ម រស្មីហង្សមាស និង បានធ្វើឱ្យមហាជនបានស្គាល់រូបនាងកាន់តែច្បាស់តាមរយៈបទចម្រៀងពីរោះៗ ជាហូរដូចជា បទ «រំខាន» បទ «ដើម្បីបង អូនលះបង់អស់ហើយ» និង បទចម្រៀងជាច្រើនទៀត ៕