Phil Foden នៅក្មេងទេ តែជួយក្រុមឱ្យឡើងវគ្គផ្តាច់ព្រ័ត្រ ពាន ២ ហើយ

កីឡាករខ្សែបម្រើ Philip Walter Foden វ័យ ២០ ឆ្នាំ សញ្ជាតិអង់គ្លេស របស់ក្លិប Manchester City ហាក់មិនសូវជាទទួលបាននូវការចាប់អារម្មណ៍ខ្លាំងឡើយ បើធៀបទៅហ្នឹងកីឡាករវ័យក្មេងកម្រិតពិភពលោកដទៃៗ ដូចជា Mbappe ឬ Haaland ជាដើម ។

បើក្រឡេកមកមើលកីឡាករវ័យក្មេងរូបនេះ វិញដ្បិតតែវ័យ ២០ ឆ្នាំមែន ក៏ប៉ុន្តែកីឡាកររូបនេះ ហាក់មានកំណត់ត្រាល្អៗជាងកីឡាករទាំងនោះ ហើយគេថែមទាំងនៅសល់ឱកាសជាច្រើនទៀតក្នុងការរីកចម្រើនទៅថ្ងៃខាងមុខទៀត ។

ក្នុងនោះដែរ Philip Walter Foden បានជួយឱ្យក្រុមលើកពាន Premier League ២ រដូវកាលមកហើយ ហើយក្នុងឆ្នាំនេះគេបានជាប់ជាជម្រើសដំបូងស្ទើរគ្រប់ការប្រកួត ដោយក្នុងនោះ បានជួយឱ្យក្រុមលើកពានមួយបាត់ទៀតហើយ និងថែមទាំងបានជួយក្រុមឡើងវគ្គផ្តាច់ព្រ័ត្រពាន ចំនួន ២ ផ្សេងទៀត ដែលគ្រោងនឹងប្រកួតវគ្គផ្តាច់ព្រ័ត្រនាពេលឆាប់ៗខាងមុខនេះ ៕