ភ្នំ ២ នៅកំពង់ឆ្នាំង មានទេសភាពពណ៌បៃតង ស្អាតដូចផ្ទាំងគំនូរ

ស្ថិតនៅចម្ងាយប្រមាណជា ៩០ គីឡូម៉ែត្រពីរាជធានីភ្នំពេញ ខេត្តកំពង់ឆ្នាំងត្រូវបានប្រជាជនខ្មែរ ក៏ដូចជាភ្ញៀវទេសចរ ស្គាល់ថា ជាខេត្តល្បីល្បាញ ខាងផលិតក្អមឆ្នាំង មានគុណភាពល្អ ដែលធ្វើអំពីដី ថែមទាំងជាខេត្តដែលសម្បូរទៅដោយ កន្លែងទេសចរណ៍បែបប្រវត្តិសាស្ត្រ ដែលមានដូចជាតំបន់ភ្នំ និង តំបន់ប្រាសាទ ជាដើម ។

ថ្មីៗនេះ មហាជនកំពុងតែចាប់អារម្មណ៍នូវ តំបន់ទេសចរណ៍ធម្មជាតិបែបភ្នំ ចំនួន ២ នៅក្នុងទឹកដីខេត្តកំពង់ឆ្នាំង ដែលកំពុងបង្អួតសម្រស់ នៅក្នុងរដូវវស្សា បង្ហាញឱ្យឃើញនូវទេសភាពស្រស់ត្រកាល ប្រៀបប្រដូចនឹងផ្ទាំងគំនូរ ដែលនៅទីនោះត្រូវបានគេស្គាល់ថាជា «ភ្នំជម្រាយ» និង «ភ្នំព្រះធាតុ» ។

ស្ថិតនៅស្រុកសាមគ្គីមានជ័យ ទឹកដីខេត្តកំពង់ឆ្នាំង ភ្នំទាំងពីរនេះ បច្ចុប្បន្នកំពុងបង្អួតសម្រស់ជាមួយនឹងទេសភាពធម្មជាតិពណ៍បៃតងស្រស់ ចាប់ពីជើងភ្នំ ដល់កំពូលភ្នំ បូកផ្សំនឹងខ្យល់ជំនោររដូវវស្សា បក់ប៉ះកាយាអ្នកដែលបានទៅទស្សនាកម្សាន្ត ឱ្យភ្លេចអស់នូវរឿងរ៉ាវខូចចិត្ត និង រលាយគ្មានសល់នូវរាល់ទុក្ខកង្វល់ផ្សេងៗ ។

សព្វថ្ងៃ ភ្នំទាំង ២ នេះ កំពុងត្រៀមបើកចិត្តបើកកាយទទួលស្វាគមន៍ភ្ញៀវទេសចរ ដែលចង់ទៅទស្សនាកម្សាន្ត និង ថតរូបលេង ក្រោយស្រាកស្រាន្តពីមេរោគរាតត្បាតកូវីដ-១៩ ៕

រូបភាពដោយ ៖ ដើរថត-derthot