ធ្វើតារាចម្រៀងសុខៗ ម៉ៅ ហាជី បង្ហើបចង់ត្រលប់ទៅកាន់គោយន្តធ្វើស្រែចម្ការវិញ

តារាចម្រៀងប្រុសដែលលេចពន្លកឡើងតាមរយៈការប្រឡងកម្មវិធីលំដាប់ពិភពលោក Cambodia idol ម៉ៅ ហាជី បច្ចុប្បន្នកំពុងបោះជំហានលើវិថីសិល្បៈយ៉ាងរលូន និង ជាតារាចម្រៀងប្រចាំផលិតកម្មថោនមួយរូបទៀតផង ដោយមានទស្សនិកជនជាច្រើនគាំទ្រ ។

អាចនិយាយបានថា ម៉ៅ ហាជី ជាតារាចម្រៀងដែលជោគជ័យគួរសមក្នុងវិស័យសិល្បៈ ព្រោះបទចម្រៀងដែលលោកចេញបំពេញអារម្មណ៍ទស្សនិកជនកន្លងមក សុទ្ធតែទទួលបានការគាំទ្រច្រើនពីមហាជន ។

ដោយឡែកនៅសុខៗ ម៉ៅ ហាជី ស្រាប់តែបង្ហើបចង់វិលត្រលប់ទៅកាន់គោយន្តធ្វើស្រែធ្វើចម្ការវិញដូចកាលពីនៅក្មេងវិញ ធ្វើឱ្យមហាជនភ្ញាក់ផ្អើលយ៉ាងខ្លាំង ។

មិនច្បាស់ថាជាការនិយាយលេងសើច ឬយ៉ាងណា តារាចម្រៀង ម៉ៅ ហាជី បានបង្ហើបថា «ខានបើកគោយន្តជាច្រើនឆ្នាំមកហើយ ពេលខ្លះក៏ធ្លាប់គិតចង់ត្រលប់ទៅវ័យកុមារភាព ដែលតែងតែទៅភ្ជួរស្រែជាមួយឪពុកខ្ញុំ និង បងប្រុសខ្ញុំ នឹកឃើញពេលនោះសប្បាយក៏សប្បាយកម្សត់ក៏កម្សត់» ។

ការលើកឡើងចង់ចាកចោលជីវិតជាអ្នកសិល្បៈដ៏ហ៊ឺហារ ហើយចង់ត្រលប់ទៅប្រើជីវភាពសាមញ្ញនៅឯស្រុកស្រែចម្ការរបស់តារាចម្រៀង ម៉ៅ ហាជី គឺធ្វើឡើងបន្ទាប់ពីលោកបានកាន់គោយន្តភ្ជួរស្រែ ខណៈលោកថត MV បទចម្រៀងថ្មីនៅផលិតកម្មថោន ៕