Sergio Agüero បង្ហាញពីកីឡាករដែលសាកសមអាវលេខ ១០ បន្តពីលោក

ខ្សែប្រយុទ្ធវ័យ ៣២ ឆ្នាំ Sergio Agüero បានសម្រេចចិត្តថានឹងមិនបន្តកុងត្រាជាមួយក្រុមទៀតទេ និង ច្បាស់ជាចាកចេញពីក្រុមនៅរដូវកាលនេះហើយ ដោយមានដំណឹងជាច្រើនបានបង្ហាញថា លោកនឹងប្ដូរទៅលេងឱ្យ Barcelona  ប៉ុន្តែនេះមិនមែនជារឿងដែលអ្នកគាំទ្រចង់ដឹងប៉ុន្មានទេ ពួកគេចង់ដឹងថា តើកីឡាកររូបណាដែលប្ដូរទៅពាក់អាវលេខ ១០ ជំនួស Agüero ។

គួរបញ្ជាក់ថា អាវលេខ ១០ ជាលេខដែលសំខាន់សម្រាប់ក្រុមបាល់ទាត់ជុំវិញពិភពលោក ដូច្នេះហើយទើបអ្នកគាំទ្រមានការទន្ទឹមរង់ចាំចម្លើយពីក្រុម Manchester City ជាខ្លាំង ។ ប៉ុន្តែថ្មីៗនេះ Sergio Agüero ម្ចាស់អាវលេខ ១០ ដែលបម្រុងនឹងចាកចេញពីក្រុម បានចេញមកនិយាយថា តាមគំនិតផ្ទាល់ខ្លួនរបស់លោក គឺចង់ឱ្យទៅខ្សែបម្រើវ័យក្មេង Phil Foden ពាក់បន្ត ។

Sergio Agüero បាននិយាយថា «ខ្ញុំគិតថា អាវលេខ ១០ គួរតែប្រគល់ទៅឱ្យ Phil Foden ប៉ុន្តែអ្នកខ្លះគិតថា គួរតែឱ្យទៅ Kevin De Bruyne វិញ ។ តាំងពី Kevin De Bruyne ប្ដូរចូលមកលេងក្នុងក្រុមគេមិនដែលប្ដូរលេខអាវទេ គេពាក់អាវលេខ ១៧ មករហូត ។ អ៊ីចឹងហើយទើបខ្ញុំគិតថាអាវលេខ ១០ គួរតែឱ្យ Phil Foden ពាក់បន្ត» ៕