ខាត់ សម្បត្តិកិត្យា និង K Sinh ផ្ទុះការចាប់អារម្មណ៍ខ្លាំង ត្រឹម Poster រឿង «មេឃខៀវ» មួយសន្លឹក
កាលពីពេលកន្លងទៅនេះ មហាជនអ្នកគាំទ្រជាច្រើនបានចាប់អារម្មណ៍ម្តងរួចមកហើយនូវរូបភាព Poster នៅក្នុងរឿង «មេឃខៀវ» របស់ផលិតកម្ម Sastra Film ដែលបានតុបតែងខ្លួនក្នុងឈុតសម្លៀកបំពាក់សិស្ស ហើយ Poster នោះដែរ ក៏មានការពេញចិត្ត និង មិនពេញចិត្តផងដែរ ពីសំណាក់មហាជនដែលយល់ឃើញថា ឯកសណ្ឋាននោះមិនត្រឹមត្រូវជាឯកសណ្ឋានសិស្សខ្មែរ ។
ដោយឡែក បើទោះជាមានការរិះគន់បន្តិចមែន ប៉ុន្តែការចាក់បញ្ចាំងរឿងនេះក៏ទទួលបានការគាំទ្រយ៉ាងខ្លាំងផងដែរ ដោយសារតែរឿងភាគ «មេឃខៀវ» នេះ បានលើកឡើងពីរឿងរ៉ាវបុរសស្រឡាញ់បុរស ។
យ៉ាងណាមិញ ថ្មីៗនេះនៅលើបណ្តាញសង្គមហ្វេសប៊ុកក៏កំពុងមានការចាប់អារម្មណ៍ព្រោងព្រាតជាថ្មីទៀតហើយ បន្ទាប់ពី Poster នៃរឿង «មេឃខៀវ» សម្រាប់ភាគថ្មី បានចែករំលែកតៗគ្នា ដោយមានតួអង្គគឺពិធីករល្បីឈ្មោះ និង ជាតារាសម្តែងស្រស់សង្ហា លោក ខាត់ សម្បត្តិកិត្យា និង តារាសម្តែងជំនាន់ថ្មី លោក K Sinh ។
គ្រាន់តែ Poster មួយនេះសោះ លោក ខាត់ សម្បត្តិកិត្យា និង លោក K Sinh បាន និង កំពុងទទួលបានការគាំទ្រយ៉ាងផុសផុលពីសំណាក់អ្នកទស្សនា ព្រោះអ្នកទាំង ២ គឺជាប្រុសសង្ហា ព្រមទាំងជាតារាសម្តែងដែលមានទេពកោសល្យ ។ លើសពីនោះ បើតាមការឱ្យដឹងពីប្រភពស្និទ្ធស្នាល នេះជាលើកទី ១ ហើយ ដែលលោក ខាត់ សម្បត្តិកិត្យា បានសម្តែងជាតួអង្គបុរសស្រឡាញ់បុរសបែបនេះ ៕
