ឆ្នាំនេះដឹងតែកក្រើក Steve Hervey នឹងត្រឡប់មកធ្វើជាពិធីករ Miss Universe 2021 វិញហើយ

លោក Steve Hervey ជាតារាកំប្លែង និង  ជាពិធីករមួយរូបដែលមានប្រជាប្រិយភាពខ្លាំងក្នុងកម្មវិធីនានា ហើយបន្ទាប់ពីលោកក្លាយជាពិធីករក្នុងកម្មវិធីប្រកួតបវរកញ្ញាចក្រវាល Miss Universe តាំងពីឆ្នាំ ២០១៥ មកនោះ កេរ្តិ៍ឈ្មោះកាន់តែល្បីសាយភាយទូទាំងពិភពលោក ។

មហាជនអ្នកគាំទ្រ ចាំមិនភ្លេចឡើយចំពោះទេពកោសល្យធ្វើជាពិធីករឆ្មើមរបស់តារាកំប្លែងរូបនេះ ក្នុងកម្មវិធី Miss Universe ហើយរយៈពេល ៥ ឆ្នាំមកហើយ មិនដែលបាត់វត្តមានលោកចេញពីកម្មវិធីប្រកួតបវរកញ្ញាចក្រវាលមួយនេះឡើយ ។

យ៉ាងណាមិញ កាលពីឆ្នាំ ២០២០ កន្លងទៅ លោក Steve Hervey បានខកខានមួយឆ្នាំ ដោយហេតុថាលោកបានបញ្ចប់កុងត្រាជាមួយកម្មវិធី ។ ទន្ទឹមនឹងបាត់វត្តមានលោកជាពិធីករ ១ ឆ្នាំនេះ ពិតធ្វើឱ្យមហាជនមានការនឹករឭកយ៉ាងខ្លាំង គឺអ្នកគាំទ្រម្នាក់ៗបន់ឱ្យលោកវិលមកវិញឆាប់ៗ ប៉ុណ្ណោះ ។

ស្របគ្នានេះដែរ ថ្មីៗនេះ មានដំណឹងមួយដែលបានធ្វើឱ្យអ្នកគាំទ្រវិស័យបវរកញ្ញាមានសេចក្ដីរំភើប បន្ទាប់កម្មវិធីប្រកួតបវរកញ្ញាចក្រវាល បាន Update ព័ត៌មានថា ការប្រកួតបវរកញ្ញាចក្រវាល ប្រចាំឆ្នាំ ២០២១ ដែលប្រព្រឹត្តិទៅក្នុងទីក្រុង Eilat ប្រទេសអ៊ីស្រាអែល ក្នុងខែធ្នូខាងមុខនេះ វត្តមានពិធីករ Steve Hervey នឹងវិលត្រឡប់ជាពិធីករដូចដើមវិញ ។

ក្រោយពីបានដំណឹងល្អបែបនេះ ពិតជាបានធ្វើឱ្យមហាជនមានសេចក្ដីរំភើប និង សប្បាយចិត្តខ្លាំងណាស់ ដោយពួកគេនឹងបានស្តាប់ការអត្ថាធិប្បាយដ៏រំជើបរំជួល ពីសំណាក់ពិធីករដ៏ឆ្នើមនេះជាថ្មីម្តងទៀត ៕