កូនស្រីទើបអាយុ ៣ ឆ្នាំសោះ Cardi B ហ៊ានជះលុយទិញកាបូបតម្លៃស្មើឡានមួយគ្រឿងឱ្យ

ថ្មីៗនេះ កំពូលតារារ៉េបប្រចាំអាមេរិក វ័យ ២៨ ឆ្នាំ ស្រីស្រស់ស៊ិចស៊ី Cardi B ទើបតែបានចំណាយលុយអស់ជាង ៤៨ ០០០ ដុល្លារ ក្នុងការទិញកាបូបដ៏ស្អាតមួយ ដើម្បីជាកាដូដល់កូនស្រីសំណព្វ Kulture ដែលមានអាយុទើបតែ ៣ ឆ្នាំប៉ុណ្ណោះ។

កាលពីថ្ងៃទី ៩ សីហា ឆ្នាំ ២០២១ កន្លងទៅ តារារ៉េបរូបនេះ បានផុសរូបភាពជាច្រើនសន្លឹកនៅលើបណ្តាញសង្គម IG របស់ខ្លួន អួតពីសម្រស់កូនស្រីដ៏គួរឱ្យស្រឡាញ់របស់នាង ក្នុងឈុតពណ៌លឿង ជាមួយនឹងខ្សែកពេជ្ររូបតុក្កតា តម្លៃជាង ១៥០ ០០០ ដុល្លារ ដែលជាកាដូក្នុងថ្ងៃខួបកំណើតរបស់នាងកាលពីខែ កក្កដា ឆ្នាំ ២០២១ កន្លងទៅ។

ព្រមជាមួយគ្នានេះដែរ មហាជនក៏បានទាក់ភ្នែកជាមួយនឹងកាបូបយួរដៃថ្មីរបស់ Kulture ផងដែរ ដែលមានរំលេចរូបឥន្ធនូភ្លឺចែងចាំង ថែមទាំងមានពណ៌លឿងស៊ីទៅនឹងឈុតរបស់នាងថែមទៀតផង។ ចំណែក តម្លៃរបស់កាបូបមួយនេះពិតជាញាក់សាច់ណាស់ គឺថ្លៃរហូតដល់ជាង ៤៨​ ០០០ ដុល្លារឯណោះ។

តម្លៃនេះ ធ្វើឱ្យមហាជនអត់សរសើរមិនបានឡើយ ពីភាពហ៊ឺហារសប្បាយចាយរបស់តារាស្រី ដែលហ៊ានចំណាយអស់ជាងរាប់ម៉ឺនដុល្លារទៅលើកូនស្រីដែលទើបតែអាយុ ៣ ឆ្នាំដូច្នេះ៕