Freshie Boy ៣ រូប ល្បីមួយឆាវបាត់មុខឈឹង កំពុងសំងំរស់នៅក្នុងជីវិតបែបនេះ

មហាជនអ្នកគាំទ្រ ជាពិសេសយុវវ័យដែលចូលចិត្តទស្សនាការប្រកួតកម្មវិធី Freshie Girl & Boy ចាប់តាំងពីជំនាន់ទី ១ ក្នុងឆ្នាំ ២០០២ រហូតមកដល់ពេលបច្ចុប្បន្ននេះ ជឿជាក់ថាប្រាដកជាបានជ្រាបហើយ បន្ទាប់ពីទទួលបានជ័យលាភី Freshie Gilr & Boy មួយចំនួនក៏នៅតែបន្តអាជីពសិល្បៈមកដល់សព្វថ្ងៃ រីឯមួយចំនួនទៀត បន្ទាប់ពីបានប្រឡូកអាជីពសិល្បៈមិនបានប៉ុន្មាន ក៏បាត់មុខឈឹងទៅវិញ។

ថ្ងៃនេះ «ប្រជាប្រិយ» នឹងនាំប្រិយមិត្តទៅតាមដានពី Freshie boy ៣ រូប ដែលបន្ទាប់ពីបានសាងកេរ្តិ៍ឈ្មោះល្បីល្បាញមួយរយៈពេល ក៏បានឃ្លាតឆ្ងាយបាត់មុខឈឹងពីសិល្បៈទៅវិញ ដោយពេលនេះ កំពុងតែបន្តដំណើរជីវិតតាមបែបរៀងៗខ្លួន។ ចង់ដឹងថា Freshie boy ទាំង ៣ រូបនេះ មាននរណាខ្លះនោះ សូមតាមដានខាងក្រោមទាំងអស់គ្នា!

១. មូល សុវណ្ណគីរី

អតីត Freshie Boy ជំនាន់ទី ៥ ប្រុសស្អាត មូល សុវណ្ណគីរី ដែលតែងលេចមុខនៅក្នុង MV ជាច្រើនក្នុងអំឡុង ឆ្នាំ ២០០៥ ដែលពិតទទួលបានការចាប់អារម្មណ៍គាំទ្រពីមហាជនជាច្រើន ប៉ុន្តែបន្ទាប់ល្បីឈ្មោះមួយរយៈធំ លោកក៏បានចាកឆ្ងាយពីជីវិតសិល្បៈទៅវិញ រហូតមកដល់បច្ចុប្បន្ន មិនដែលឃើញវត្តមានរបស់លោកលើវិថីសិល្បៈទៀតឡើយ។ ពេលនេះ Freshie boy ចំណាត់ថ្នាក់លេខ ៣ រូបនេះ ហាក់កំពុងតែមមាញឹកខ្លាំងលើមុខជំនួញជាច្រើន បើតាមរយៈការបង្ហោះលើបណ្ដាញសង្គមរបស់លោក គឺលោកកំពុងរកស៊ីលក់ផលិតផលថែរក្សាសម្រស់ ក៏ដូចជាប្រកបរបរលក់ដី ផ្ទះ និង រថយន្តផងដែរ។ លើសពីនេះ សង្កេតឃើញថាអតីត Freshie boy រូបនេះ កំពុងមានជីវិតរស់នៅយ៉ាងហាយសូរ និង រីករាយយ៉ាងខ្លាំងទៀតផង។

២. កែវ បូរ៉ា

លោក កែវ បូរ៉ា ជា Freshie Boy ចំណាត់ថ្នាក់លេខ ១ ជំនាន់ទី ៧ ឆ្នាំ ២០០៨ ក្រោយពីទទួលបានជ័យលាភីលេខ ១ Freshie Boy រូបនេះ ក៏បានបន្តដំណើរជាពិធីករ និង តារាសម្តែងខ្សែភាពយន្តជាច្រើនទៀតផង។ ដោយឡែក រហូតមកដល់ឆ្នាំ ២០១៥ អតីត និង ជាតារាប្រុសដ៏មានប្រជាប្រិយភាពរូបនេះ ក៏បានឃ្លាតឆ្ងាយពីសិល្បៈទៅវិញ ស្របពេលសម្រេចចិត្តបញ្ចប់ភាពនៅលីវ សាងគ្រួសារជាមួយភរិយាដ៏ស្រស់ស្អាតជាកូនកាត់ខ្មែរ-ប៊ុលហ្គារី ដែលគឺជាអតីត Frshie Girl ចំណាត់ថ្នាក់លេខ ៣ ជំនាន់ទី ១០ ឆ្នាំ ២០១១ គឺអ្នកនាង បូប៊ី រស្មី។ ក្រោយពីរៀបការសាងគ្រួសារដ៏មានសុភមង្គល ពេលនេះ អតីត Freshie Boy រូបនេះ និង ភរិយា ទទួលបានចំណងដៃកូនប្រុស ២ នាក់ និង កូនស្រីម្នាក់។

៣. ប៉ែន ចាន់សិទ្ធិ

អតីត Freshie Boy លេខ ១ ឆ្នាំ ២០០៩ លោក ប៉ែន ចាន់សិទ្ធិ បន្ទាប់ពីទទួលបានជ័យលាភី លោកហាក់ទទួលបានការស្រឡាញ់គាំទ្រខ្លាំងពីមហាជនជាមួយ ការសម្ដែងខ្សែភាពយន្តផ្សេងៗ ក៏លេចមុខក្នុងស្ពតពាណិជ្ជកម្មឱ្យក្រុមហ៊ុនក្នុងស្រុកដ៏ល្បីថែមទៀត។ ដោយឡែក ក្រោយពីទទួលបានប្រជាប្រិយភាពខ្លាំងបានប៉ុន្មានឆ្នាំ លោកហាក់ស្ងាត់ពីការងារសិល្បៈទៅវិញ ដោយបច្ចុប្បន្ននេះ បើក្រឡេកមកមើលជីវិតឯកជនរបស់រូបលោកវិញ គឺលោកកំពុងតែមានភាពមមាញឹកខ្លាំង ជាមួយនឹងមុខរបររកស៊ីផ្ទាល់ខ្លួន គឺអាជីពលក់ផលិតផលតាមអនឡាញ។ លើសពីនេះ ជីវិតរស់នៅរបស់លោក គេសង្កេតឃើញថា ពិតជាសម្បូរបែបមិនធម្មតានោះទេ មានផ្ទះធំទ្រនំខ្ពស់ និង ប្រើប្រាស់របស់របរទំនើបៗថែមទៀតតផង៕