តារាចម្រៀងស្រី ៤ ដួង ជាហង្សក្ដាប់តំណែងគ្រាប់ពេជ្រ ឈរលំដាប់ទី ១ នៅក្នុងផលិតកម្មធំៗ

វិស័យចម្រៀង អាចនិយាយបានថាជាសិល្បៈកម្សាន្តមួយដ៏ពេញនិយមខ្លាំងនៅក្នុងទីផ្សារប្រទេសកម្ពុជា ដោយប៉ុន្មានឆ្នាំចុងក្រោយនេះ គេឃើញមានផលិតកម្មផ្សេងៗបានកកើតឡើងជាបន្តបន្ទាប់ដើម្បីប្រជែងទីផ្សារ ដណ្ដើមយកប្រជាប្រិយភាពពីមហាជនរៀងៗខ្លួន ព្រោះថានៅក្នុងផលិតកម្មនីមួយៗសម្បូរទៅដោយតារាចម្រៀងល្បីៗជាច្រើន មានទេពកោសល្យខ្ពស់ ដែលសុទ្ធសឹងតែលេចធ្លោ និង មានប្រជាប្រិយភាពខ្លាំងប្រចាំផលិតកម្មរៀងៗខ្លួន។

តួយ៉ាងតារាចម្រៀងស្រី ៤ ដួង ត្រូវបានមហាជនចាត់ទុកជាគ្រាប់ពេជ្រដ៏មានតម្លៃប្រចាំផលិតកម្មធំៗ។ ចង់ដឹងមានតារាចម្រៀងរូបណាខ្លះ តស់! តាមដានខាងក្រោម ៖

១. ឱក សុគន្ធកញ្ញា

ឱក សុគន្ធកញ្ញា ជាកំពូលតារាចម្រៀងស្រីដ៏ល្បីល្បាញ និង លេចធ្លោមួយរូបប្រចាំប្រទេសកម្ពុជា មិនត្រឹមតែប៉ុណ្ណោះ នាងក៏ត្រូវគេចាត់ទុកថាជាតារាចម្រៀងស្រីដែលល្បី និង មានប្រជាប្រិយភាពបំផុតប្រចាំផលិតកម្មរស្មីហង្សមាសដែរ។ ដោយសារតែមានទេពកោសល្យយ៉ាងប៉ិនប្រសប់ក្នុងវិស័យចម្រៀង ទាំងទឹកដមសំឡេង រួមទាំងភាពបត់បែនទៅតាមទម្រង់នៃបទចម្រៀងនោះ ទើបធ្វើឱ្យរាល់បទចម្រៀងរបស់នាងសុទ្ធតែទទួលបានការគាំទ្រខ្លាំងពីមហាជន។ ក្រោមហេតុផលទំាំងនេះហើយទើបធ្វើឱ្យនាងក្លាយជាគ្រាប់ពេជ្រដ៏សំខាន់ និង មិនអាចខ្វះបានប្រចាំផលិតកម្មរស្មីហង្សមាស។

២. មាស សុខសោភា

កំពូលតារាចម្រៀងស្រីពោរពេញដោយទេពកោសល្យ មាស សុខសោភា ត្រូវបានផលិតកម្មរៀមលើកឱ្យក្លាយជាគ្រាប់ពេជ្រដ៏សំខាន់ប្រចាំផលិតកម្មរបស់ខ្លួន ដោយកាលពីពេលកន្លងទៅ ផលិតកម្មមួយនេះធ្លាប់រៀបចំពិធីយ៉ាងអធិកអធ័មមួយទទួលស្វាគមន៍ មាស សុខសោភា ចូលទៅក្នុងផលិតកម្មរបស់ខ្លួន។ លើសពីនេះ បើតាមទឹកដមសំឡេង ក៏ដូចជាប្រជាប្រិយភាពដែល មាស សុខសោភា មានកន្លងមក ទោះបីនាងទើបតែក្លាយជាសមាជិករបស់ផលិតកម្មរៀមក៏ដោយ ក៏នាងអាចក្ដាប់តំណែងគ្រាប់ពេជ្របានយ៉ាងងាយផងដែរ។

៣. សុខ ពិសី

តារាចម្រៀងសាច់សខ្ចី សំឡេងស្រួយស្រេស សុខ ពិសី ត្រូវបានមហាជនស្គាល់យ៉ាងច្បាស់ថាជាតារាចម្រៀងស្រីដែលមានប្រជាប្រិយខ្លាំងប្រចាំផលិតកម្មសាន់ដេ។ ដោយសារតែរាល់បទចម្រៀងរបស់នាងទទួលបានការគាំទ្រខ្លាំង ហើយក៏ជាតារាចម្រៀងស្រីដែលជ្រកក្រោមទ្រនំនេះយ៉ាងយូរមិនប្រែ ហើយបច្ចុប្បន្ន នាងនៅតែក្ដោបបានតំណែងជាតារាចម្រៀងគ្រាប់ពេជ្រប្រចាំផលិតកម្មសាន់ដេដដែល ។

៤. តន់ ច័ន្ទសីម៉ា

ផលិតកម្មថ្មីទើបនឹងលេចពន្លកនៅលើទីផ្សារប្រទេសកម្ពុជា «Galaxy Navatra» ត្រូវបានគេដឹងថាមានតារាចម្រៀងស្រី តន់ ច័ន្ទសីម៉ា ជាតារាចម្រៀងគ្រាប់ពេជ្រដ៏សំខាន់ប្រចាំផលិតកម្ម ដោយចាប់តាំងពីឈានជើងចូលផលិតកម្មមួយនេះ នាងមានបទចម្រៀងថ្មីៗ ពីរោះៗចេញលើទីផ្សារជាហូរហែ ហើយបទនីមួយៗសុទ្ធសឹងតែមានការសម្រិតសម្រាំងយ៉ាងល្អ និង ទទួលបានការគាំទ្រយ៉ាងច្រើនផុសផុលពីទស្សនិកជន ៕