កំពូលតារាស្រីចាស់វស្សា ៨ រូប ត្រូវប៉ាន់បំផុត ដើរតួម្តាយ តួយាយ ក្នុងរឿងភាគកូរ៉េ

បើនិយាយទៅដល់តារាសម្តែងស្រីជើងចាស់របស់កូរ៉េខាងត្បូង ប្រិយមិត្តមហាជនអ្នកគាំទ្រមួយចំនួនប្រាកដជាបានស្គាល់ និង ចំណាំមុខខ្លះៗទៅហើយ តាមរយៈការនិយមជក់ចិត្តទស្សនារឿងភាគល្បីៗ ដែលពួកគាត់និយមសម្តែងជាតួអង្គម្តាយ ឬ យាយ ជាដើមនោះ ហើយបើទោះបីជាមានវ័យកាន់តែជ្រេទៅមុខយ៉ាងណាក្តី តែពួកគាត់នៅតែមានហាងឆេងកាក់កបដដែល ព្រោះសមត្ថភាពសម្តែង និង កម្លាំងកាយរបស់ពួកគាត់។ ថ្ងៃនេះ «ប្រជាប្រិយ» សូមនាំអារម្មណ៍ប្រិយមិត្តមកស្គាល់តារាសម្តែងស្រីជើងចាស់ទាំង ៨ ដួង ដែលមិនងាយបាត់មុខក្នុងរឿងភាគកូរ៉េទាំងអស់គ្នា ​៖

១. Kim Mi Kyung

តារាស្រីរូបនេះ សព្វថ្ងៃមានអាយុជាង ៥៨ ឆ្នាំទៅហើយ។ លោកស្រីមានបទពិសោធក្នុងវិស័យសិល្បៈរហូតជាង ៣៦ ឆ្នាំឯណោះ ដោយបានមមាញឹកយ៉ាងខ្លាំងក្នុងការដើរសម្តែងជាតួអង្គអ្នកម្តាយមិនដាច់នោះទេ។ ថ្មីៗនេះលោកស្រីបានលេចមុខនៅក្នុងរឿងល្បីប្រចាំឆ្នាំ ២០២០ «Its okay to be not okay» ក្រៅពីនោះនៅក្នុង ឆ្នាំ ២០២១ នេះ លោកស្រីក៏បានមានវត្តមាននៅក្នុងរឿងភាគជាបន្តបន្ទាប់ផងដែរ ហើយក៏ត្រៀមខ្លួនសម្តែងរឿងថ្មីៗក្នុងឆ្នាំ ២០២២​ ថែមទៀតផង។

២. Kim Young Ok

លោកយាយកំពូលតារាសម្តែងជើងចាស់ សព្វថ្ងៃនេះមានអាយុជាង ៨៤ ឆ្នាំទៅហើយ ប៉ុន្តែប្រជាប្រិយភាពការស្រឡាញ់ចូលចិត្តពីសំណាក់មហាជនរបស់លោកយាយ ហាក់កាន់តែកើនឡើងជាលំដាប់ ព្រោះតែការនៅតស៊ូបម្រើនៅក្នុងសិល្បៈនោះ។ បើនិយាយត្រួសៗ លោកយាយបានចូលប្រឡូកសិល្បៈជាង ៦០ ឆ្នាំមកហើយ ពោលគឺតាំងពីនៅអាយុ ១៩ ឆ្នាំមកម៉្លេះ។ សព្វថ្ងៃនេះ គេនៅតែប្រទះលោកយាយរូបនេះ នៅក្នុងរឿងភាគល្បីៗក្នុងតួអង្គជាលោកយាយចាស់ជរាមិនសូវខានឡើយ ជាពិសេសថ្មីនេះៗ គឺរឿង «Squid Game, Home town Cha Cha Cha» ជាដើម។

៣. Kim Hae Sook

តារាស្រី Kim Hae Sook បច្ចុប្បន្នមានអាយុជាង ៦៥ ឆ្នាំ ហើយមានបទពិសោធក្នុងវិថីសិល្បៈជាង ៤៧ ឆ្នាំឯណោះ។ លោកស្រីបានឈ្នះពានរង្វាន់មិនតិចជាង ១០ ពាននោះទេ។ នៅក្នុងឆ្នាំ ២០២០​ និង ២០២១ នេះ លោកស្រីបានលេចមុខនៅក្នុងរឿងភាគចំនួន ៥ រឿងឯណោះ ដោយភាគច្រើនបានដើរតួជាតួអង្គម្តាយ និង តួអង្គលោកយាយនោះឯង។ ក្រៅពីការមមាញឹកក្នុងការងារសិល្បៈហើយ លោកស្រីក៏បានឆ្លៀតសរសេរ និង បោះពុម្ពសៀវភៅដោយខ្លួនឯងបានចំនួន ១ ក្បាលថែមទៀតផង ដែលមានចំណងជើងថា «Mother of Hallyu» ។

៤. Youn Yuh Jung

តារាស្រី​ Youn Yuh Jung មានអាយុ ៧៤​ ឆ្នាំហើយនៅក្នុងឆ្នាំនេះ តែលោកយាយបានប្រឡូកក្នុងការសម្តែងអស់ជាង ៥០ ហើយ​ ដែលយើងបានឃើញវត្តមានរបស់លោកយាយនៅក្នុងរឿងភាគ និង ភាពយន្តរបស់កូរ៉េនោះ។ លើសពីនេះទៅទៀត នៅក្នុងឆ្នាំ ២០២០ កន្លងទៅ លោកយាយកាន់តែទទួលបានការទទួលស្គាល់គាំទ្រពីសំណាក់អន្តរជាតិថែមទៀត តាមរយៈភាពយន្តរបស់កូរ៉េរឿង «Minari» ដោយលោកយាយថែមទាំងបានឈ្នះពានរង្វាន់អន្តរជាតិធំៗជាច្រើន ជាពិសេសមានដូចជា Oscars ថែមទៀតផង។ នៅក្នុងឆ្នាំ ២០២២ ខាងមុខនេះ លោកយាយក៏បានត្រៀមខ្លួនដើរជាតួឯកនៅក្នុងរឿង «Tree dies On their feet» ផងដែរ។

៥. Bae Jong Ok

តារាស្រីរូបនេះ សព្វថ្ងៃមានអាយុ ៥៧ ឆ្នាំទៅហើយ​ ហើយលោកស្រីបានបង្ហាញខ្លួនក្នុងការសម្តែងតាំងពី ១៩៨៨ មកម្ល៉េះ ពោលគឺជាង ៣៣ ឆ្នាំឯណោះបើគិតត្រួសៗ។ ក្រៅពីមមាញឹកនៅក្នុងការងារសិល្បៈហើយ លោកស្រីថែមទាំងបានឆ្លៀតសិក្សាបញ្ចប់ថ្នាក់បណ្ឌិតមកពីសាកលវិទ្យាកំពូលរបស់កូរ៉េ ហើយលោកស្រីក៏បានឆ្លៀតធ្វើជាសាស្រ្តាចារ្យបង្រៀនផ្នែកភាពយន្តនៅសាកលវិទ្យាល័យថែមទៀតផង។ នៅក្នុងឆ្នាំ ២០២០ និង ២០២១​ នេះ លោកស្រីក៏បានលេចមុខនៅក្នុងរឿងភាគ «Mr. Queen» និង «Secret Royal inspector & Joy» ផងដែរ។

៦. Kim Ja Ok

ពិតជាគួរឱ្យសោកស្តាយណាស់ តារាស្រីរូបនេះបានបាត់បង់ជីវិតនាឆ្នាំ ២០១៤ ក្នុងអាយុ ៦៣ ឆ្នាំ ដោយសារតែជំងឺមហារីសួតបាត់ទៅហើយ តែបើនិយាយពីប្រវត្តិត្រួសរបស់លោកស្រីវិញនោះ គឺលោកស្រីបានប្រឡូកសិល្បៈអស់ជាង ៤០ ឆ្នាំឯណោះ ដោយបានបន្សល់ការចងចាំ និងអនុស្សាវរីយ៍ឱ្យអ្នកគាំទ្រនៅក្នុងរឿងភាគល្បីៗមិនតិចនោះទេ។ លោកស្រីបានលេចមុខជាលើកចុងក្រោយបង្អស់ គឺនៅក្នុងរឿងភាគ «The Women Who married Three times» នាឆ្នាំ ២០១៣។

៧. Kim Min Kyung

តារាស្រីរូបនេះ ទើបតែបានបាត់បង់ជីវិតនៅក្នុង ខែសីហា ឆ្នាំ ២០២១ នេះ ដោយនៅក្នុងវ័យ ៦១ ឆ្នាំ ហើយមូលហេតុនៃការស្លាប់របស់លោកស្រីមិនបានគេឱ្យដឹងនោះទេ។ យ៉ាងណាមិញ តារាស្រីរូបនេះបានប្រឡូកក្នុងសិល្បៈអស់រយៈពេលជាង ៤០ ឆ្នាំទៅហើយ ដែលស្នាដៃចុងក្រោយរបស់លោកស្រីមុននឹងចែកឋាននេះគឺ «Mouse the good supper» ។

៨. Jeon Mi Seon

តារាស្រីវ័យ ៤៨ ឆ្នាំរូបនេះ បានបាត់បង់ជីវិត ដោយត្រូវបានគេប្រទះឃើញចង-ក សម្លាប់ខ្លួននៅក្នុងអូតែលមួយកន្លែងកាលពីឆ្នាំ ២០១៩ កន្លងទៅ។ តារាសម្តែងស្រីរូបនេះ បានឈានជើងចូលប្រឡូកសិល្បៈតាំងពីអាយុ ១៦ ឆ្នាំមកម្ល៉េះ ហើយស្នាដៃចុងក្រោយរបស់នាង គឺ «He is the psychometric»៕