Smart ភ័យស្ទើរប៉ះសក់ ទម្លាយរឿងពិតស្មានដល់មួយ ពេលទិញគល់ឈើចាស់អាយុ ២០ ឆ្នាំ មកតាំងផ្ទះ

បច្ចុប្បន្ននេះ ទោះបីសង្គមមានការរីចម្រើនជឿនលឿនទៅហើយក្តី តែជំនឿអរូប្បិយក៏នៅតែមានដដែល គ្រាន់តែវាអាស្រ័យលើការជឿរបស់មនុស្សតែប៉ុណ្ណោះ។ មួយជីវិតរបស់មនុស្សគឺបានជួបនូវរឿងប្លែកៗជាច្រើនខុសៗគ្នា ជាពិសេសរឿងខ្មោច ព្រាយ បិសាចនេះតែម្ដង។

យ៉ាងណាមិញ ងាកទៅមើលតារាសម្ដែងប្រុសជួរមុខលោក Smart Krissada ឯណោះវិញ ថ្មីៗនេះស្រាប់តែចេញមកផ្ដល់បទសម្ភាសមួយ ហើយបាននិយាយពីរឿងរ៉ាវដែលមិនគួរឱ្យជឿ ដែលបានកើតឡើងចំពោះលោកផ្ទាល់។ ក្នុងនោះតារាប្រុសរូបនេះបានទម្លាយថា លោកបានទិញគល់ឈើមួយដើមពីខេត្តឈៀងម៉ៃ ដើម្បីយកមកតុបតែងលម្អផ្ទះ ក៏ប៉ុន្តែវាមានរឿងដ៏ភ្ញាក់ផ្អើលមួយបានកើតឡើងនៅពេលដែលគល់ឈើនោះបានមកកាន់ផ្ទះរបស់លោក។

ខណៈពេលដែលលោកបានយកគល់ឈើនោះមកដល់ផ្ទះ ក៏ស្រាប់តែតារាប្រុសរូបនេះបានមើលឃើញតាចាស់សក់សម្នាក់ឈរសម្លឹងមើលមកលោក តែលោកហាក់មិនបានចាប់អារម្មណ៍ដំបូងគិតថាមនុស្សធម្មតា តែមួយសន្ទុះក្រោយមកក៏បាត់ទៅវិញ ដែលនេះធ្វើឱ្យលោកភ្ញាក់ផ្អើលជាខ្លាំង ព្រោះតែធ្លាប់ឃើញតែក្នុងរឿង តែពេលមកដល់ជួបផ្ទាល់ស្រស់បែបនេះ ក៏ធ្វើឱ្យលោកមានអារម្មណ៍ថាភ័យខ្លាចខ្លះដែរ។

បន្ទាប់ពីឃើញវិញ្ញាណលោកតាចិនសក់សនោះ លោកក៏បានទាក់ទងទៅសួរដើមទងពីម្ចាស់ដែលលោកបានទិញ ហើយអ្នកលក់ក៏បានប្រាប់ថា ឈើមួយដើមនោះគឺមានអាយុកាលមក ២០ ឆ្នាំហើយ តែកន្លងមកក៏គេពុំដែលមានជួបរឿងដូចលោកដែរ។

យ៉ាងណាមិញ ដោយយល់ឃើញថាដើមឈើមួយដើមនោះមានវិញ្ញាណ លោកក៏បានយកទៅតាំងក្នុងសួនក្បែរផ្ទះ។ សម្រាប់រឿងរ៉ាវនេះ គឺលោកបានឃើញត្រឹមតែខ្លួនលោកប៉ុណ្ណោះ សម្រាប់សមាជិកដទៃក្នុងផ្ទះគឺគ្មាននរណាម្នាក់ធ្លាប់បានឃើញនោះទេ វាពិតជាចម្លែកណាស់សម្រាប់លោក៕